Mijëra euro për larje të veturave

Ministrat e Qeverisë së Kosovës janë të kujdesshëm kur të marrin rrugë me veturat e tyre zyrtare. Përveç që kujdesen të jenë komfore, ato i mbajnë edhe të pastra. Për këtë punë çdo vit shpenzojnë mijëra euro. Sivjet tenderë për “larje të veturave”, deri tani kanë shpallur disa ministri dhe shumat sillen nga 200 deri në 6000 euro.

Sipas njoftimeve në Komisionin Regullativ të Prokurimit, nga fillimi i këtij viti e deri më tani kanë shpallur tenderë për larje të veturave Ministria e Administrimit të Pushtetit Lokal, Ministria e Diasporës, ajo e Infrastrukturës dhe Ministria e Bujqësisë.

Ministria e Administrimit të Pushtetit Lokal që udhëhiqet nga ministri Slobodan Petroviq, për këtë vit ka vendosur të shpenzojë 3 mijë euro për larjen e veturave.

Në njoftimin e KRPP-së thuhet se çmimi për njësi do të jetë 203.00 euro. Ndërkaq, tenderin për këtë punë e ka fituar Autolarje “Liria”. E njëjta kompani do t’i pastrojë edhe veturat e Ministrisë së Diasporës që udhëhiqet nga Ibrahim Makolli. Siç thuhet në njoftimin për dhënie të tenderit, kjo ministri do t’i shpenzojë për këtë vit 1,500.00 euro, ndërsa çmimi për njësi thuhet të jetë 9.00 euro.(Tribuna)