UBT

Miftaraj thotë se liberalizimi i vizave do të ndodhë, jep afate kur kosovarët lëvizin lirshëm

/ 3 minuta lexim

Drejtori i Institutit të Kosovës për Drejtësi, Ehat Miftaraj, thotë se Gjermania dhe Franca kanë ndryshuar qëndrim sa i përket liberalizimit të vizave për Kosovën, raporton Ekonomia Online.

Duke folur për këtë proces, Miftaraj thotë se liberalizimi i vizave mbetet ende në diskrecionin e ministrave të Punëve të Brendshme të shteteve anëtare të BE-së.

Ai ka dhënë edhe afatet se kur kosovarët do të mund të lëvizin lirshëm në zonën Schengen, nëse fitohet liberalizimi. “Kjo varet se çfarë praktike ose çfarë afati kohor e përcaktojnë këtë rast Këshilli i Ministrave të Bashkimit Evropian, dhe nëse e marrim praktikat e shteteve të ndryshme. Ka pasur shtete që prej momentin kur merret vendimi për liberalizim të vizave, kanë caktuar afate tre mujore që janë më të shkurtra deri në afatet gjashtë apo nëntë mujore pra prej ditës kur merret vendimi. Kështu që mbetet në vullnetin e ministrave Punëve të Brendshme të shteteve të BE-së sesa do të caktojnë afat për t’iu mundësuar qytetarëve të Kosovës për të lëvizur lirshëm”, u shpreh Miftaraj për EO.

UBT

Miftaraj është optimist se më në fund Kosova do ta fitojë liberalizimin, gjë që thotë se në aspektin e kritereve, Kosova i ka plotësuar vite më parë.“Në aspektin e plotësimit të kritereve teknike, Kosova i ka plotësuar vite më parë. Në anën tjetër ky është vendim politik që i takon thuajse çdo Qeverie, ku e dimë që më të zorshmit kanë qenë Franca dhe Holanda, dhe me vetë faktin se Franca fatmirësisht i ka mbajtur zgjedhjet dhe ka një presidencë të re që presidenti Macron do ta ketë një mandat të plotë, kështu që besoj se do ta ketë më të lehtë për të marrë një vendim në këtë kohë për t’i liberalizuar vizat për Kosovën”, u shpreh ai.Tutje Miftaraj u shpreh se ndryshimi qëndrimeve të Francës dhe Gjermanisë, do të mundohen që ta bindin edhe Holandën për të pasur vendim pozitiv.

Miftaraj thotë se skepticizimi i këtyre shteteve ekziston për shkak të ikjes në këto shtete të recidivistëve me vepra penale.“Sa kam qenë pjesë e grupeve punuese, kemi pasur takime me shtetet e ndryshme, dhe kryesisht problemin kryesor këto shtete e kanë pasur, ka qenë sesa do të jetë numri i personave që mund të shkojnë në Holandë, Francë e Gjermani, dhe pastaj sesa këta shtetas që shkojnë mund t’i takojnë grupeve të caktuara kriminale dhe të cilat mund të pësojnë qytetarët e atyre shteteve si rezultat i veprave penale që mund të kryhen”.“Po me vetë faktin që Gjermania dhe Franca, por shumë e rëndësishme është Franca ka lëshuar një komunikatë përmes të cilave e përkrahin liberalizimin e vizave, unë besoj se kjo është kthesa më e madhe që ka ndodhur prej më shumë se 12 viteve prej kur e kemi filluar procesin e liberalizimit të vizave. Një shtet tjetër që ka qenë pengesë, është edhe Holanda dhe unë besoj se kur Franca dhe Gjermania janë për, jam i sigurt se do ta bindin edhe Holandën për të pasur një vendim pozitiv për liberalizim”, u shpreh tutje Miftaraj.