Mezani: Disa lojtarë nuk e meritojnë Gjilanin

Gjilan – Trajneri i Gjilanit, Gentjan Mezani, pas humbjes në derbi kundër Dritës, ka theksuar se ndjen keqardhje për këtë rezultat pasi skuadra e Gjilanit zhvilloi një ndeshje të mirë.

“Kemi luajtur një ndeshje të mirë. Në pjesën e parë jemi mbrojtur mirë. Mendoj që kemi pasur mundësi në pjesën e parë për të shënuar. Ishim më ofenzivë, krijuam edhe raste. Por ky është futbolli. Jemi futur me dëshirën për ta fituar ndeshjen. Deri te momenti i golit ishim stabil prapa. Lëndimi i Melos Bajramit na destabilizoi, mbrojtja ra te goli. Hyri një lojtar me përvojë dhe është dashur të jetë më i kujdesshëm. Skuadra ka nevojë për përforcime. Do të studiojmë mirë pozicionet ku kemi nevojë. Nuk guxojmë të gabojmë në përzgjedhjen e lojtarëve. Disa lojtarë nuk e kanë merituar të jenë pjesë e Gjilanit. Këtë ua kam thënë edhe atyre dhe e them edhe publikisht. Në futboll vlen ajo që jep e jo ajo që ke dhënë. Do të marrim lojtarë që ndihmojnë skuadrën”, ka shtuar Mezani.

Skuadra e Gjilanit në javën e ardhshme do të takohet me Dukagjinin në Klinë./rajonipress/