Meta: Të nderojmë flamurin kombëtar dhe të qëndrojmë të bashkuar

Presidenti i Shqipërisë, Ilir Meta ka thënë se në ditën e flamurit e cila i gjeti në zi dhe në betejë me pasojat e tmerrshme të një tërmeti, qytetarët duhet të angazhohen për të nderuar flamurin kombëtar, dhe të qëndrojnë të bashkuar deri në rikthimin e normalitetit të plotë të jetës për të gjithë familjet shqiptare dhe fëmijët e tyre.

Meta ka thënë se këtë ditë të bekuar e ka nisur duke vizituar familjet që kanë mbetur pa strehë në Sukth, transmeton Telegrafi.

“Të dashur bashkatdhetarë kudo ku jeni. Në këtë ditë që është më e rëndësishmja për shtetin dhe kombin tonë, por që na gjeti në zi dhe në betejë me pasojat e tmerrshme të një tërmeti të pamëshirshëm, ju ftoj të angazhohemi për të nderuar Flamurin tonë Kombëtar dhe të qëndrojmë të bashkuar deri në rikthimin e normalitetit të plotë të jetës për të gjithë familjet shqiptare dhe fëmijët e tyre. Sot e nisa këtë ditë të bekuar të kombit tonë duke vizituar familjet që kanë mbetur pa strehë në Sukth, ku takova edhe Amelian, e cila edhe pse ka dy ditë që jeton në çadër e në kushte të veshtira, sot kishte zgjedhur të vishej me ngjyrat e Flamurit Kombëtar”, ka shkruar ai në profilin e tij në Facebook.

Meta ka thënë se sa më shumë të bëhet për këta fëmijë, aq më shumë ata do ta nderojnë flamurin kombëtar dhe shtetin e tyre kur të rriten./Telegrafi/