Meta në takim me Konjufcën: Gjithçka e lidhë Shqipërinë me Kosovën

Kryetari i Kuvendit, Glauk Konjufca, priti sot në takim presidentin e Shqipërisë, Ilir Meta, i cili po qëndron për vizitë zyrtare në Kosovë me rastin e përmbylljes së mandatit të tij.

Zyra për media e Kuvendit njofton se Konjufca dhe Meta shkëmbyen mendime për zhvillimet në rajon dhe më gjerë, ecurinë e proceseve integruese dhe domosdoshmërinë e bashkërendimit të veprimeve përballë proceseve që kanë përpara Kosova e Shqipëria.

“Kryetari Konjufca i shprehu mirënjohje presidentit Meta për bashkëpunimin dhe mbështetjen që i ka dhënë Kosovës jo vetëm si president i Shqipërisë, duke i dëshiruar suksese në angazhimet e ardhshme”, thuhet më komunikatën për media.

Ndërsa, nga ana e tij, presidenti Meta e falënderoi kryetarin e Kuvendit për pritjen dhe vuri në pah, siç tha, sukseset e arritura së bashku dhe nevojën e një bashkëpunimi sa më të ngushtë mes dy vendeve.

“Gjithçka e lidhë Shqipërinë me Kosovën. Tërësia identitare, historia, gjuha, besimi, kultura, tradita, zakonet, interesat dhe perspektiva euroatlantike. Është e rëndësishme të bashkëpunojmë sa më shumë, t’i fuqizojmë sa më parë marrëveshjet e ndërsjella dhe të mos krijojmë debate të panevojshme”, theksoi, ndër të tjera, presidenti Meta.

Më pas, ky i fundit iu adresua deputetëve të Kuvendit të Kosovës në një seancë të veçantë, e cila u organizua me rastin e vizitës së tij të fundit në këtë detyrë.​ /Telegrafi/

Shpërndaje.
© RAJONIPRESS