Mësimi plotësues prioritet i ministrit Murati

Ministri kosovar i Diasporës, Valon Murati tha se mësimi plotësues në diasporë dhe nxitja e mërgimtarëve për të investuar në Kosovë, mbeten prioritete të MeD-it

Mësimi plotësues i gjuhës shqipe në diasporë dhe nxitja e bashkatdhetarëve për të investuar në Kosovë, janë dy projekte me prioritet të Ministrit së Diasporës. Kështu deklaroi ministri Valon Murati gjatë një takimi që zhvilloi me ambasadoren e Republikës Federale të Gjermanisë në Prishtinë, Angelika Viets.

Ambasadorja gjermane u njoftua nga ministri Murati me punën e deritashme të këtij dikasteri, si dhe u shqyrtua mundësia e thellimi të bashkëpunimit ndërinstitucional në fusha të ndryshme, veçanërisht të diasporës shqiptare e cila është më e koncentruar në Gjermani.

“Nëse ne dërgojmë një mesazh të mirë që Kosova është e gatshme për të pranuar investimet, unionet tona të bizneseve në Diasporë do të luajnë një rol të rëndësishëm në krijimin e urave të bashkëpunimit me kompani të fuqishme në vendet ku ato veprojnë”, theksoi mes tjerash ministri Murati.

Ambasadorja Viets i prezantoi ministrit Murati përvojën e Gjermanisë në projektet për kthimin e kuadrove akademike në Gjermani, si dhe ofroi bashkëpunimin e ambasadës në përmbushjen e prioriteteve të Ministrisë.

“Një diasporë e integruar mirë do të thotë edhe një Kosovë më e mirë në të gjitha fushat. Imazhi i Republikës së Kosovës jashtë nuk është edhe më i miri, dhe kjo duhet të përmirësohet pasi që Republika Federale e Gjermanisë ka dëshirë të thellojë bashkëpunimin me Kosovën”, tha Viets.

Në fund u ra dakord që të mbahen edhe takime të tjera të rregullta ashtu që të identifikohen të gjitha fushat e mundshme të bashkëpunimit në të mirë të Kosovës dhe diasporës në Gjermani.