Merret në pyetje mjeku Zijadin Hasani

Gjilan – Zijadin Hasani shef i repartit të pediatrisë është marrë në pyetje nga njësiti kundër krimit ekonomik dhe antikorrupsion i dyshuar për shpërdorim të detyrës zyrtare.

Edhe një mjek me pozitë të lartë është marrë në pyetje nga policia e Gjilanit. Ismet Hashani zëdhënës i policisë në Gjilan tha për rajonipress se më 13. 09. 2012 rreth orës 16.00 njësiti kundër krimit ekonomik dhe antikorrupsion e ka pasur një informatë për shpërdorim të detyrës zyrtare, në spitalin rajonal të Gjilanit. Ky njësit e ka njoftuar prokurorin i cili ka urdhëruar që i dyshuari të sillet në polici i cili edhe është marrë në pyetje në prani të avokatit mbrojtës .I dyshuari pas intervistimit nga policia është liruar kurse hetimet rreth rastit janë në vazhdim e sipër tha Hashani.

Burimet tona nga Prokuroria e Qarkut thanë se Zijadin Hasani dyshohet se ka keqpërdorur një sasi të ampulave pronë e spitalit e të cilët fare nuk figurojnë në raportin zyrtar. Ndryshe Hasani ka pasur pozitën e drejtorit klinik dhe të zëdhënësit të spitalit në kohën e udhëheqjes nga Xhavit Hajdari, i akuzuar për ryshfet dhe shpërdorim të detyrës zyrtare.

Ndërkaq Abdylatif Latifi ushtrues detyre i drejtorit në spitalin e Gjilanit tha se me kohë i kemi paralajmëruar të gjithë mjekët specialistë se do të ketë zero tolerancë ndaj atyre që e keqpërdorin etikën e mjekut. “Unë në start e kam formuar komisionin e etikës mjekësore i cili edhe po jep efekt sepse rastet e fundit janë rezultat i bashkëpunimit të pacientëve me institucionet shëndetësore të Gjilanit” tha Latifi./rajonipress/