Merkel: Kosova ta luftojë krimin e organizuar dhe korrupsionin

Kancelarja gjermane, Angela Merkel, ka thënë në konferencë të përbashkët për media me presidentin Hashim Thaçi, se Kosova ka perspektivë për anëtarësim në Bashkimin Europian.

Merkel ka përmendur se Kosova duhet të fokusohet më shumë në luftimin e korrupsionit dhe krimit të organizuar.

Ajo ka theksuar se duhet të zbatohen marrëveshjet e arritura ndërmjet Kosovës dhe Serbisë.

Merkel tha gjatë një konference për media se ka pasur zhvillime pozitive edhe në këtë drejtim.

“Temë qendrore lidhur me përafrimin drejt Bashkimit Evropian janë marrëdhëniet ndërmjet Serbisë dhe Kosovës. Kjo sipas pikëpamjes sime dhe sipas bisedës që kemi pasur sot është një temë qendrore që nuk është temë aq e thjeshtë, por duhet të themi se ka pasur zhvillime pozitive edhe në këtë drejtim”.

“Marrëveshjet e arritura deri më tani duhet të zbatohen dhe unë mendoj që aktualisht prioritet është edhe çështja energjetike dhe këto biseda do të zhvillohen gjatë takimit tonë në Sofje të Bullgarisë ”, tha Merkel.

Merkel tha se sfidues për shtetin e Kosovës mbetet sundimi i ligjit, luftimi i korrupsionit, numri i lartë i papunësisë dhe problemet tjera që ndikojnë në zhvillimin e bashkëpunimit ekonomik.

“Kemi tashmë 10 vjet që Kosova është shtet i pavarur dhe prej shpalljes së pavarësisë së Kosovës mund të them që është arritur shumë. Më shumë se 100 shtete kanë njohur pavarësinë e Kosovës, por kemi ende shumë probleme të pazgjidhura dhe ka hapa që duhet të ndiqen, mirëpo ka edhe përmirësime me rrugëtimin drejt Bashkimit Evropian”, tha Merkel.

Merkel më pas ka folur për marrëdhënien e përbashkët mes Kosovës e Gjermanisë. Ka deklaruar se kjo marrëdhënie është e shkëlqyeshme. Kancelarja nuk ka lënë pa përmendur se janë 350 mijë kosovarë që kanë nënshtetësi edhe gjermane.

Ajo ka premtuar se do të angazhohet që të rrisë numrin e njohjeve për Kosovën.