Meriton Salihu: Do të japim gjithçka nga vetja për të mposhtur Holandën

Kombëtarja e Kosovës në futsall nën drejtimin e Përzgjedhësit të ri Agon Ramadani, po i vazhdojnë përgatitjet dy herë në ditë për tu përballur në ndeshjen e fundit por të rëndësishme me “tulipanët” e Holandës, ndeshje e cila zhvillohet të premten me 3 mars në ora 17:00 në Pallatin e Rinisë dhe Sporteve në Prishtinë.

Kjo ndeshje është me vlerë të madhe për “Dardanët” e futsallit, pasiqë një fitore ndaj Holandës me dy gola diferencë dhe nëse Ukraina e mposht në ndeshjen e fundin Holandën, “Dardanët” e Kosovës do të jenë në “Botërorin 2024”, që do të ishte një sukses tejet i madh për Kombëtaren e Kosovës. Njëri ndër futbollistët më të mirë tek Kosova është padyshim Meriton Salihu, i cili me shumë sukses po mbron ngjyrat e skuadrës nga Zvicra “Futsall Maniacs”, dhe i cili njiherit ishte golashënues në ndeshjen me Ukrainën.

Para ndeshjes me Holandën, Salihu shpreson se me bashkëlojtarët e tij do t’ja arrijnë qëllimin. “Është një ndeshje me peshë të madhe, të gjithë bashkëlojtarët janë mobilizuar që në këtë ndeshje të dalim faqebardhë. Në ndeshjen e parë ishim më të mirë se Holanda por pa meritë në fund pësuam humbje. Do të jetë një ndeshje me adrenalinë të madhe, do të japim gjithçka nga vetja për të arritur fitore e cila me siguri do të na qonte drejt Botërorit 2024, urojë që Pallati i Rinisë dhe Sporteve në kryeqytet të jetë i stërmbushur nga tifozët “Dardanët”, për të na përkrahur dhe për të arritur këtë fitore historike dhe në fund të gjithë së bashku t`i gëzohemi fitores”, ka bërë të ditur njëri ndër adutët kryesor tek Kosova, Meriton Salihu.