Mërgimtarët pushojnë në Karaqevën e “trazuar”

Gjilan – Selver Lenjani thotë se mërgimtarët e Karaqevës edhe këtë vit po pushojnë në vendlindjen e trazuar për shkak të pasigurisë dhe kontestit që mbretëron tash e 17 vite me Serbinë.

Selver Lenjani thotë për rajonipress se edhe në sytë e mërgimtarëve vërehet një dëshpërim i madh tek institucionet e Kosovës. “Pyetja e parë që ata bëjnë tek ne është se pse Parlamenti e Qeveria nuk flasin për problemin e Karaqevës. Vërtet nuk di më çfarë të ju them sepse janë bërë vite e ky problem as nuk po diskutohet e as nuk po vendoset” shprehet Lenjani.

Lenjani thotë se fatkeqësisht ose fatmirësisht familjet nga Karaqeva që migruan në vitin 2014 shumica prej tyre janë kthyer në vendlindje. “Fëmijët e tyre tashmë i janë kthyer shkollës, por pasiguria po na bren dhe po na krijon telashe” shprehet Lenjani.

Për Lenjanin është e pashpjegueshme heshtja institucionale karshi problemet të Karaqevës. “Jam i sigurt se kontesti me Malin e Zi është minor në krahasim me vijën kufitare që ka Karaqeva me Serbinë” thotë Lenjani, për të cilin heshtja e deputetëve të Anamoravës dhe mos ngritja e zërit të tyre në Parlament është më shumë se krim”./rajonipress/