Mentor Mihovci drejtor i administratës së përgjithshme

Gjilan – Me propozimin e AKR-së në Gjilan dhe me aprovimin e kreut të Komunës Qemajl Mustafa, Mentor Mihovci është emëruar drejtor në administratën e përgjithshme në Gjilan. Omer Daku tha se Mihovci është një kuadër i dëshmuar derisa AKR-ja në të gjithë dikasteret ka treguar performancë të mirë.

Koalicioni PDK-AKR në Gjilan ka arritur ta caktojë drejtorin e ri në administratën e përgjithshme në Gjilan, vend ky që ishte lënë bosh pas largimit dhe transferimit në Prishtinë të Arben Dubovës.

Me propozimin e degës së AKR-së në Gjilan , emri i Mentor Mihovcit i është dërguar për aprovim edhe kreut të komunës Qemajl Mustafa. Në vendimin për emërimin e drejtorit Mihovci të nënshkruar nga Qemajl Mustafa thuhet se pas konsultimeve të nivelit politikë të koalicionit qeverisës, kemi ardhur në konstatim se Mentor Mihovci i posedon të gjitha kualitetet menaxheriale dhe politike për udhëheqjen e këtij sektori të rëndësishëm të komunës” thuhet në arsyetimin e Mustafës.

Ndërkaq Omer Daku kryetar i AKR-së në Gjilan dhe nënkryetar komune tha për rajonipress se Mihovci është kuadër i dëshmuar dhe ka një përvojë të mirë në punët administrative. “AKR-ja po dëshmon se ka kuadro të afta e të përgatitura dhe jo rastësisht tani jemi shpallur më të mirët në të gjithë dikasterët që udhëheq AKR “ tha Daku.

Daku tha se tani kur pritet të vijnë mërgimtarët drejtorit të ri i është propozuar që të hap një sportel enkas për mërgimtarët dhe që orari i punës të fillojë më herët duke punuar edhe ditëve të shtune.

Vet Mentor Mihovci tha për rajonipress se detyra që ai ka marrë donë përkushtim e guxim sepse është një sektor i ndjeshëm dhe ku donë efikasitet dhe shpejtësi.”Besoj që puna e jonë do të reflektojë pozitivisht dhe ne jemi të interesuar që qytetarët t`i pajisim me dokumente edhe shpejt dhe pa vonesa. Kuptohet sistemi i ri dhe i fundit ka qitur disa komplikime , por shpejt gjithçka do të stabilizohet dhe normalizohet” tha Mihovci./rajonipress/