Mehmeti i LDK-së kërkon dorëheqjen e Izmi Zekës

Gjilan – Në seancën e së enjtes të Asamblesë Komunale Arben Mehmeti i LDK-së ka kërkuar dorëheqjen e kryesuesit të Kuvendit Komunal, Izmi Zeka, me arsyetimin se LDK-ja tani është partia më e madhe dhe se duhet t`i lejohet asaj që të udhëheq me organin vendimmarrës.

Nuk u ka bërë përshtypje koalicionit qeverisës në Gjilan kërkesa e LDK-së për të dhënë dorëheqje kryesuesi i Kuvendit Komunal Izmi Zeka.

Pas Lutfi Hazirit i cili i pari ishte që kërkoj dorëheqjen e Izmi Zekës nga pozita e kryesuesit të Kuvendit Komunal të enjten edhe Arben Mehmeti shef i grupit parlamentar të LDK-së ka kërkuar nga Zeka që të japi dorëheqje.

Lutfi Haziri menjëherë pas marrjes së pozitës së Zenun Pajazitit në krye të PDK-së e kishte uruar dhe porositur këtë të fundit që në radhë të parë t`i riparojë gabimet dhe shkeljet ligjore që janë bërë në Gjilan nën kryesimin e Izmi Zekës si kryesues i Kuvendit.

Haziri e pati rikujtuar Pajazitin se Zeka duhet të japi dorëheqje sepse nën udhëheqjen e tij janë marrë shumë vendime të kundërligjshme si Partneriteti Publiko Privat, projekti i Fidanishtës dhe të gjitha vendimet e tjera të kundërligjshme që janë marrë nga krerët e PDK-së e që janë kundërshtuar fuqishëm nga LDK-ja dhe opozita duhet të kthehen në binarët ligjor pati thënë Haziri.

Kurse Arben Mehmeti duke e arsyetuar kërkesën e tij për dorëheqjen e Zekës tha se LDK-ja është partia më e madhe dhe se është momenti që asaj t`i lejohet të udhëheq me organin vendimmarrës.

Por kërkesa e Mehmetit nuk zgjoi shumë kureshtjen pasiqe për këtë u përkujdes Ejup Haziri i PDK i cili tha se pavarësisht se LDK-ja tash i ka 15 ulëse në Kuvendin Komunal, subjekti më i madh mbetet koalicioni qeverisës./rajonipress/