Meha të shkarkohet, jo t’i trefishohet paga

Partitë opozitare vlerësojnë se Murat Meha është dashur të shkarkohet dhe të përballet me ligjin për humbjen e mijëra hektarëve tokë të Kosovës, e jo të shpërblehet me trefishim të pagës.

Përfaqësues të opozitës dhe të shoqërisë civile vlerësojnë se Murat Mehës, kryetarit të Komisionit shtetëror për Shënjimin e Vijës Kufitare me Malin e Zi, të cilit po i kontestohet puna, nuk është dashur të shpërblehet me trefishim të pagës, por me shkarkim të tij.

Sipas formularëve të deklarimit të pasurisë për vitin 2016, paga vjetore e Mehës është rritur nga 5770 euro në 16200 euro.

Zyrtari i AAK-së, Muharrem Nitaj, subjekt politik ky që ka kundërshtuar ashpër punën e Komisionit që e ka drejtuar Meha, thotë për “Zërin” se ky i fundit është dashur të përballet me gjyqin për punën e tij, e jo të shpërblehet me trefishim të pagës.

“Mund ta kenë shpërblyer se ka punuar kundër interesave të shtetit. Nuk po shoh asnjë arsye tjetër. Një person si ai, në çdo vend tjetër të botës, do të ishte në një proces gjyqësor për veprimet që ka bërë, ndërkaq në Kosovë i rritet paga”, tha Nitaj./zeri/