Meha-Konyaspor, vazhdojnë edhe tri vjet?

Alban Meha mbetet në qendër të projektit të Konyaspor. Klubi turk ka gati rinovimin e kontratës me mesfushorin shqiptar. Sipas gazetës Fanatik, përcjell Supersport, drejtuesit e skuadrës do të ulen prej kësaj jave për të diskutuar rreth shtyrjes së qëndrimit të Mehas në qytetin e Konyas.

Kontrata e 29-vjeçarit përfundon në fund të sezonit dhe bardhjeshilët synojnë që t’i ofrojnë tre vjet rinovim. Mesfushori shqiptar ishte padyshim blerja më e goditur e skuadrës turke, duke rezultuar në një element kyç, në ecurinë e jashtëzakonshme të këtij edicioni.

Meha është titullar i padiskutueshëm te Konyaspor, ku numëron 21 ndeshje të luajtura në kampionat, ku ka shënuar edhe 4 gola.

Me lojën e tij, shqiptari e ka ndihmuar skuadrën e Kocaman që të renditet në vendin e tretë në kampionat, pas Beşiktaş dhe Fenerbahçe dhe të jetë pranë sigurimit të një vendi drejt Europa League.

Alban Meha ishte një prej lojtarëve më të rëndësishëm edhe në Kupën e Turqisë, me Konyasporin që është kualifikuar në gjysmëfinale, pasi eliminoi Beşiktaşin, me kuqeziun që në ndeshjen e kthimit realizoi golin e fitores 1-0.

Edhe pse mungoi në dy miqësoret e Kombëtares, në kuadër të përgatitjeve drejt Euro 2016, në Super Ligën turke të futbollit mesfushori po përjeton një prej sezoneve më të mirë në karrierë dhe rinovimi i kontratës për tre vjet të tjerë është shpërblimi i merituar nga Konyaspor.