Mediat në Kosovë para shumë sfidave

Prishtinë – Instituti për Politika Zhvillimore (INDEP) prezantoi të mërkurën studimin “Gjendja e Mediave në Kosovë”, studim ky që analizon zhvillimet dhe ngecjet e medias.

I realizuar në bashkëpunim me Asociacionin e Gazetarëve Profesionistë të Kosovës (AGPK), ky studim ka analizuar problemet e vazhdueshme të sektorit të mediave në vend me fokus të veçantë në raportet ndërkombëtare për mediat në Kosovë.

“Problemet me të cilat ballafaqohet sektori i medias në Kosovë janë probleme të vazhdueshme dhe konsistente për shumë vjet. Ky studim i elaboron këto probleme dhe parasheh një rrugë të shumëtrajtshme për zgjidhjen e tyre,” ka thënë gjatë prazantimit Krenar Gashi, Drejtor Ekzekutiv i INDEP.

Ndër problemet kryesore të identifikuara nga INDEP spikatet çështja e ligjeve që rregullojnë fushën e mediave, veçanërisht mungesa e qasjes së gazetarëve në dokumente publike. Njëkohësisht, analiza e INDEP thekson se gazetarët dhe redaktorët vazhdojnë të jenë subjekt të dhunës dhe kërcënimeve.

“Edhe pse nuk mund të mohohet progresi, gazetarët dhe mediat në Kosovë akoma ballafaqohen me presione e madje edhe me dhunë, krahas mungesës së mbrojtjes institucionale dhe mungesës së vullnetit politik për të siguruar media të lira e shumë sfida të tjera,” ka thënë Shkamb Qavdarbasha, autor i punimit.

Sidoqoftë, në raport thuhet se duke pasur parasysh sfidat e shumta me te cilat ballafaqohen mediat, disa shtëpi mediale vazhdojnë të bëjnë punë të mirë. Megjithatë, gazetarëve akoma u ofrohen mundësi të limituara për avancim profesional si dhe shumë shtëpi mediale në vend nuk janë të vetëqëndrueshme.

INDEP dhe AGPK u kanë bërë thirrje të gjitha institucioneve relevante në raport që të ndërmarrin hapa për të vendosur një ambient më të sigurt të punës për gazetarë. Gjithashtu, të dy institucionet u bëjnë thirrje mediave që të investojnë në profesionalizimin e stafit të tyre si dhe në zhvillimin e gazetarisë si mënyrë e sigurimit të vetëqëndrueshmërisë financiare.

Studimi është përkrahur nga Ambasada Holandeze në Prishtinë dhe Free Press Unlimited.

Shpërndaje.
© RAJONIPRESS