Më trego, o gjysh

Poezi nga Ramadan Mehmeti

Më trego, o gjysh
Kur ishe i ri
Më trego në besë
Ke pasur dashuri?

Më thuaj, më thuaj
Pashë dy sytë e zi
Njohe ti nanushin
Apo të njohu ajo ty?

E njohe në shkollë
Në orën e historisë
Nën degë të bliri
A te hija e qershisë?

Të lutem, o gjysh
Më trego se ç’ndodh
Kur dikë e do
Si syri një mollë?

Më thuaj, më thuaj
Më herët ta di
Ku rri dashuria
Që më ndrit në sy?

– Po, or nip i mirë
Ajo ndez një zjarr
Sikur dhe çdo ëndërr
Të digjet ngadalë.

Gjumi yt i parë
Sikur është barkë
Ku gjithë dashuria
Bulëzon si në arkë.