Me plan veprimi kundër korrupsionit

Ashtu siç edhe ishte parashikuar, Këshilli Prokurorial i Kosovës ka aprovuar planin e veprimit për rritjen e sistemit prokurorial në luftë kundër korrupsionit. I aprovuar më 1 nëntor, qëllimi i këtij plani të veprimit është që përveç ndihmës në përballjen me korrupsionin, ta luftojë edhe krimin e organizuar. Kjo pasi që deri më 30 qershor të vitit të ardhshëm të gjitha rastet që kanë të bëjnë me korrupsionin duhet të zgjidhen.

Numri i personave që dyshohet se janë të përfshirë në këto vepra penale është 1 mijë e 685 veta. Tribuna ka raportuar më 24 tetor të këtij viti se Këshilli Prokurorial i Kosovës ka obliguar kryeprokurorët e Prokurorive Themelore në shkallë vendi dhe zv/prokurorin e Prokurorisë Speciale, që të hartojnë një plan të veprimit.

“Qëllimi është që jo vetëm të luftohet korrupsioni, por edhe Raporti i Progresit për vitin tjetër i Komisionit Evropian të jetë më pozitiv në këtë pikë”, ka thënë një zyrtar i lartë nga prokuroria. Me këtë plan ata duhet të parashikojnë me saktësi se si do të zgjidhen këto raste duke përfshirë dhe afatin kohor…(Tribuna).