Më jep faqen

Poezi nga Avdush Canaj

Babi i ka thënë mamit:
-Më jep syrin!
Mami është përgjigjur e buzëqeshur:
-Ani, shpirt!
-Më jep faqen!-ka shtuar babi.
Mami ka thënë:
-Ja ku i ke, diell!
Babi s`është ngopur. Ka kërkuar edhe më :
-Edhe buzët trëndafil
-Të qofshin falë, puhi vere!
-Edhe qerpikun…
-Merre,merre!
Dhe puth e puth, e puth!
E dini çka ka ndodhur pastaj?
Pastaj ka ardhur LUÇI,
do të thotë UNË- GUGUÇI
që tashti shkoj në foshnjore ashtu si ka hije,
shtëpia është bërë DET lumturie.
S`kam kohë më shumë,
ika me violinë.
Më presin lodrat atje nën tavolinë.
..
Nga libri Dallëndyshet e gjumit, tregime-roman, botoi SHB Asdreni, Prishtinë, 2011