Më i pasur se Kryeministria

Pasuria e zëvendëskryeministrit të Kosovës Ramiz Kelmendit, është tri herë më e madhe sesa buxheti i Zyrës së kryeministrit për vitin 2017.

Zëvendëskryeministri i Kosovës, Ramiz Kelmendi, aktualisht është zyrtari më i pasur në institucionet e shtetit e ku pasuria e tij e deklaruar në Agjencinë Kundër Korrupsionit (AKK) është tri herë më madhe sesa buxheti i Zyrës së kryeministrit për vitin 2017. Pasuria totale që vetë Kelmendi e ka deklaruar në AAK është më e madhe se 55 milionë euro. Kelmendi është pronar i rrjetit më të madh të supermarketeve thuajse në gjithë territorin e Kosovës “ETC”.

Kelmendi për një kohë ishte zyrtar i lartë në Aleancën për Ardhmërinë e Kosovës, të Ramush Haradinajt. Me premtimin se do ta marrë postin e zëvendëskryeministrit ai braktisi këtë parti dhe aderoi në Partinë Demokratike të Kosovës (PDK), por pasi që edhe në këtë parti ai nuk e arriti qëllimin e tij të kamotshëm Kelmendi braktisi edhe këtë parti, ku për një kohë mbeti deputet i pavarur në Kuvendin e Kosovës. Por, së fundmi ai arriti qëllimin duke u bërë zëvendëskryeministër në Lidhjen Demokratike të Kosovës (LDK), e udhëhequr nga Isa Mustafa.

Kelmendi në formularët e AKK-së ka vetëdeklaruar se është pronar i një sipërfaqeje të madhe të tokës, vlera e së cilës, sipas tij, është 19 milionë e 403 mijë euro. Kelmendi po ashtu ka deklaruar se ka në pronësi edhe objekte biznesore në vlerë prej 29 milionë e 787 mijë eurosh./zeri/