Me 350 inspektorë nuk mbikëqyren 60 mijë biznese

ATK-ja kërkon rritjen e numrit të inspektorëve.MF-ja arsyetohet se nuk ka buxhet

Analistë ekonomie dhe deputetë të opozitës thonë se për të gjitha qeveritë e pasluftës në Kosovë, përfshirë këtu edhe Qeverinë aktuale të Isa Mustafës, nuk është prioritet luftimi i evazionit fiskal dhe kontrabandës, por zhvatjes së shtetit

Tash e një kohë të gjatë të gjithë drejtuesit e mëhershëm të ATK-së i kanë kërkuar, zyrtarisht dhe me shkrim, të gjithë ministrave të Ministrisë së Financave të Kosovës rritjen e numrit të inspektorëve tatimorë. Por, kanë qenë zyrtarët e MF-së ata që gjithmonë e kanë refuzuar ta bëjnë një gjë të tillë dhe ata janë arsyetuar për mungesë të buxhetit. Në përgjigjen e zëdhënëses së ATK-së, Valentina Bytyqi-Sefa, është thënë se disa herë zyrtarisht kanë kërkuar nga MF-ja rritjen e numrit të inspektorëve tatimorë, por kërkesa është refuzuar nga MF-ja në kontinuitet me arsyetimin se nuk ka mjete për rritjen e numrin e tyre.

Ekspertët e ekonomisë dhe deputetët opozitarë janë të një mendimi se me vetëm gjithsej 350 inspektorë tatimorë ATK-ja nuk mundet që të kontrollojë mbi 60 mijë bizneset që afarojnë në Kosovë. Deputeti Bali Muharremaj (AAK) thotë se e gjithë kjo punë e MF-së dhe ATK-së, por edhe e Qeverisë së ‘Isa Mustafës’ është e qëllimtë dhe bëhet për të përfituar materialisht nga evazioni i madh fiskal që vlerësohet të jetë afro 2 miliardë euro në vit që po e bëjnë pushtetarët.

Qeveria mashtruese

Sipas deputetit Muharremaj nuk qëndrojnë arsyetimet e MF-së se për rritjen e numrit të inspektorëve tatimorë, ka mungesë buxheti .”Kjo është një gënjeshtër e kulluar që po e dëgjojmë tash e një dekadë edhe nga qeveritë paraardhëse të Hashim Thaçit, por edhe nga qeveritarët e tashëm aktualë”. Deputeti Muharremaj pajtohet me vlerësimin se ATK-ja me vetëm 350 inspektorë tatimorë në dispozicion dhe Doganat e Kosovës nuk mund ta luftojnë evazionin fiskal dhe veprimtarinë e mbi 60 mijë bizneseve në terren.

“Heshtja e kësaj Qeverie lë vend për dyshime se kjo po bëhet qëllimisht nga pushtetarët aktualë, sepse po duket se edhe ata përfitojnë pjesën e tyre të “tallit”(hises) nga ky biznes i pistë sikurse edhe pushtetarët e mëhershëm”, theksoi ai. Ndërsa drejtuesit e Odës Ekonomike Amerikane edhe njëherë e kanë përsëritur kërkesën e tyre lidhur me numrin e vogël të inspektorëve tatimorë në Kosovë. Lidhur me çështjen, eksperti i ekonomisë,Visar Hapçiu, menaxher i politikave dhe marrëdhënieve me Qeverinë, tha se Oda Ekonomike Amerikane në Kosovë edhe më herët ka shprehur shqetësimin e saj lidhur me kapacitetet e limituara në aspekt të inspektorëve të Administratës Tatimore të Kosovës, duke theksuar se një numër i tillë pamundëson luftimin e ekonomisë joformale në mënyrë efikase. “Tani me hyrjen e MSA-së në fuqi, besojmë se rritja e kapaciteteve për mbledhjen e të hyrave në brendi të vendit është edhe më e domosdoshme”./kosova sot/