Më 17 mars, Limaj në gjyq

Është caktuar seanca e parë gjyqësore në shqyrtimin e rastit ndaj Fatmir Limajt dhe të tjerëve. Fjala është për rastin që njihet si MTPT2. Deputeti Limaj dhe tre të tjerë akuzohen për keqpërdorim të detyrës zyratre dhe përfitim material prej 890 mijë eurosh.

Kjo ka të bëjë për kohën sa Limaj ka qenë ministër në Ministrinë e Transportit dhe Postë-Telekomunikacionit. Misioni i EULEX-it në Prishtinë konfirmon për Tribunën se gjyqtari ka vendosur që seanca e parë fillestare në lidhje me këtë rast të mbahet më 17 mars 2014.

“Kjo seancë ndaj të akuzuarve do të mbahet në Gjykatën Themelore në Prishtinë, përkatësisht në Kino ABC 1 me fillim nga ora 09 e 30 minuta”, tha Blerim Krasniqi, zëdhënës i EULEX-it.

Ndërkohë, Tomë Gashi, avokat i të akuzuarit Fatmir Limaj, tha të enjten se nuk ka marrë asnjë njoftim për caktimin e seancës fillestare në lidhje me këtë rast.

Limaj akuzohet nga prokurori i EULEX-it se më 2008 themeloi një grup kriminal me pjesëmarrje edhe të vëllezërve Demir e Florim Limaj…(Tribuna).