MD-Ministria e Dështimit

Dikasteri i Drejtësisë bllokoi reformat e sistemit. Gjykatat dhe Prokuroritë, të dirigjuara nga politika

‘Ministria e Drejtësisë, në krye me ministrin Hajredin Kuçi, është përgjegjëse kryesore për mosfunksionimin e sistemit të drejtësisë”, thekson deputetja Albulena Haxhiu

Ministria e Drejtësisë luan një rol tejet të rëndë- sishëm në ndërtimin e një shteti efikas, ku respektohen ligji dhe rendi. Puna e kësaj ministrie reflekton dukshëm jetën në vend dhe nuk ndikon vetëm në një lëmi të vetme, por ndikimi i saj mbetet më i gjerë se kaq.

Zhvillimi dhe zbatimi i politikave për të siguruar qasje të drejtë dhe efektive në sistemin e drejtësisë, për të gjithë pjesëtarët e komuniteteve në pajtim me ligjin në fuqi, zhvillimi i politikës brenda fushës së saj të përgjegjësisë, si dhe mundësimi i përgatitjeve dhe zbatimit të legjislacionit në fushën e drejtësisë, janë vetëm disa nga pikat që janë pjesë e misionit të kësaj ministrie.

Dështimi i luftimit të korrupsionit dhe krimit të organizuar bëri që qytetarët e Kosovës të vazhdojnë të mbesin të izoluar edhe këtë vit, pasi Raporti i fundit i Komisionit Evropian konstatoi që janë 8 pika, të cilat nuk janë të plotësuara tërësisht në mënyrë që të jepet drita e gjelbër për lëvizje të lirë në Zonën Schengen edhe për qytetarët e Kosovës. Prokuroria dhe gjykatat nuk arritën që as këtë vit të ofrojnë një ambient të besueshëm për qytetarët. Drejtësia selektive dhe mosdënimi i zyrtarëve të lartë për afera korruptive e bëjnë sistemin e drejtësisë joefektiv./kosova sot/