Mburret komandanti, falënderon qytetarët për bashkëpunim

Gjilan – Remzi Azemi komandant i stacionit policor në Gjilan flet me mburrje për vitin 2014 dhe të gjitha sfidat që ka kaluar policia e këtij rajoni. Në veçanti Azemi falënderon qytetarët për bashkëpunim dhe vetëdijësim të tyre për të ndihmuar policinë në zbardhjen e krimit dhe në luftimin e të gjitha dukurive negative në shoqëri.

Remzi Azemi është komandant i stacionit policor në Gjilan. Është i bindur se policia në këtë qytet ka punuar në mënyrë profesionale dhe ka luftuar krimin e të gjitha llojeve.

Azemi megjithatë thotë se ky efikasitet i policisë ka edhe një adresë falënderimi që u takon qytetarëve të Gjilanit. “Ne vërtet pa ndihmën e tyre nuk do i kishim këto rezultate. Qytetarët na kanë ndihmuar dhe po na ndihmojnë në zbardhjen e shumë krimeve duke përfshirë vjedhjet e të gjitha llojeve, krimet e natyrave tjera. Qytetarët janë ata që neve na ndjekin në çdo hap dhe nuk na lënë të gabojmë” shprehet Azemi.

Azemi thotë se edhe në vitin 2015 policia e këtij qyteti do të mobilizohet dhe do të jetë edhe më aktive në shkolla e institucione publike për të evituar të gjitha dukuritë negative dhe të dëmshme për rininë tonë. “Ne tashmë jemi pjesë e disa projekteve për të edukuar nxënësit në shkolla dhe për të qenë sa më afër atyre të rinjve që mund të bien pre e këtyre dukurive tepër shqetësuese”.

Azemi tha se është i lumtur që gjatë vitit 2014 në Gjilan nuk ka pasur asnjë vrasje. /rajonipress/