Mbrojtja konteston ligjshmërinë e aktgjykimit në rastin e Shefket Musliut

Gjilan – Njëri nga avokatët mbrojtës të Shefket Musliut, Masar Morina tha për rajonipress se ka bërë ankesë në Gjykatën Themelore të Gjilanit për të kontestuar ligjshmërinë e aktgjykimit të Gjykatës së Apelit. Morina tha se aktgjykimi ka kontradikta sepse nuk është në harmoni me aktakuzën.

Avokatët mbrojtës nuk janë pajtuar me aktgjykimin e Gjykatës së Apelit që vepron në kuadër të EULEX-it në rastin e ish komandantit të UÇPMB-së Shefket Musliu. Mbrojtja ndryshe ka pritur shumë nga Gjykata e Apelit e cila edhe ishte shpresa e vetme që rasti i Musliut të kthehej në rigjykim ose që t`i ulej shkalla e dënimit.

Njëri nga avokatët mbrojtës në rastin Musliu, Masar Moria tha për rajonipress se pasi e kanë lexuar në tërësi aktgjykimin e Gjykatës së Apelit e cila i vërtetoj dënimin prej 10 vite e 6 muaj burgim për Shefket Musliun dhe 6 vite e 9 muaj për Besim Tahirin, kanë vërejtur se aktgjykimi ka kontradikta.”Unë kam bërë kërkesë me shkrim për të bërë vlerësimin e ligjshmërisë së aktgjykimit të Gjykatës së Apelit sepse aktgjykimi kështu siç është ka kontradikta, madje çuditërisht edhe aktakuza del e paqartë” tha Morina.

Morina tha se aktgjykimi nuk është në harmoni me aktakuzën sepse në një vend thotë se Shefket Musliu është dënuar me 10 vite e 6 muaj burgim e në një vend tjetër thotë 9 vite. “Këto paqartësi dhe pasaktësi na kanë shtyrë që ne të dorëzojmë kërkesën tonë sepse ky është edhe mjeti i fundit juridik i ankesës në rastin e Shefket Musliut” tha Morina.

Edhe Morina tha se ndihet i befasuar me vendimin e Gjykatës së Apelit. “Shefket Musliu ka pasur një gjykim shumë të montuar dhe me prapavijë politike. Edhe reagimi i tij se nuk i njeh vendimet e EULEX-it është normal sepse ishte viktimë e disa gjykimeve të UNMIK-ut. Ne mendonim se EULEX-i do të krijonte rend ligjor dhe profesionalizëm në sistemin gjyqësor, por ndodhi e kundërta” tha Morina.

Edhe ish ushtarët e UÇPMB-së i kanë bërë thirrje Shefket Musliut që mos të njoh vendimet e EULEX-it.”Besojmë që EULEX-i nuk do ta përsëris ketë gabim , po ashtu besojmë që edhe Qeveria e Kosovës do t`i ndihmoj këtij procesi gjyqësor që një herë e përgjithmonë të mbyllet ky rast sepse edhe ata edhe ne si popull i dimë vlerat e Shefket Musliut. Nuk po kërkojmë mëshirë, por mbyllje të rastit sepse me këto akuza po tentohet të njolloset një figure e ndritur e popullit shqiptar” kanë thënë për rajonipress ish ushtarët eprorët, komandantët dhe gjithë familjarët e dëshmorëve.

Madje këta ish ushtarë e kanë porositur EULEX-in se nëse ndodh diçka e pa pritur atëherë ata nuk garantojnë paqe në rajon. “EULEX nëse je për paqe mos harro Shefket Musliu ishte nënshkrues i paqes” kanë thënë ish ushtarakët.

Ndryshe pak ditë më herët Gjykata e Apelit (EULEX) e kryesuar nga kryerja e kolegjit Hajnalka Veronika Karpati kishte refuzuar dy ankesat e avokatëve mbrojtës si të pabazuara dhe ka vërtetuar aktgjykimin e kundërshtuar nga mbrojtja. Edhe Shefket Musliut edhe Besim Tahirit i është vërtetuar dënimi i shqiptuar nga Gjykata e Qarkut në Gjilan.

Kryetarja e Kolegjit Hajnalka Veronika Karpati në vendimin e saj ka thënë se kjo gjykatë konfirmon dënimin unik ndaj të akuzuarve Musliu e Tahiri. “Gjykata e Apelit nuk ka gjetur asnjë të metë faktike apo ligjore në vlerësimin e trupit gjykues”.

Ndryshe Shefket Musliu është dënuar me 12 vite burgim së bashku me Besim Tahirin i dënuar shtatë vite burgim dhe Feriz Qerimin me 5 vite burgim, në qershor të vitit 2004 nga kolegji penal i Gjykatës së Qarkut në Gjilan i kryesuar nga Vinod Bolello .

Grupi i Musliut është akuzuar për veprat penale të «rrëmbimit», «kidnapimit», «shtrëngimit».

Shefket Musliu nga fshati Konqul i Bujanocit i arrestuar më 7 korrik të vitit 2003, Besim Tahiri nga fshati Miresh i Gjilanit i arrestuar më 7 shtator 2003 dhe Feriz Qerimi nga fshati Llovcë e Gjilanit i arrestuar më 17 gusht 2003, gjithsejtë kanë marrë 24 vite burg.

Shefqet Musliu ka mbajtur mbi 8 vite burg kurse Feriz Qerimi në mungesë të provave ishte liruar nga Gjykata Supreme e Kosovës , ndërsa më 3 dhjetor të vitit 2009 nga persona të panjohur ishte vrarë afër hallës së sporteve në Gjilan./rajonipress/