Mbi katër dekada me ditar në duar

Nga Arsim Halili – Këto ditë fillim shkurti, pas një periudhe të gjatë, respektivisht mbi katër dekada me ditar në duar, arsimtari i Mësimit klasor nga fshati Dobrosin Ali Rexhepi, e përmbylli punën si mësimdhënës. Ai gjithë karrierën e tij prej mësimdhënësi e filloi dhe mbaroi në fshatin e lindjes në Dobrosin komuna e Bujanocit.

Ali Rexhepi thotë: se ndihet krenar që përkundër vështirësive të natyrave të ndryshme, ka arritur të përcjell gjenerata e gjenerata, dhe si rezultat i gjithë kësaj, ish nxënësit e tij kanë arritur që sot të krijojnë profile e tyre profesionale, gjë që kanë dëshmuar me të arriturat e tyre kudo që ata ndodhen. Kjo sigurisht e bënë krenar secilin mësimdhënës, natyrisht edhe arsimtarin Ali.

Duhet thënë se për punën dhe përkushtimin profesional, kolektivi i shkollës fillore “Sami Frashëri“ paralelja e ndarë në Dobrosin i ka ndarë Mirënjohje për kontributin e tij.

Mirënjohje për kontributin e dhënë e tani më si veteran i arsimit i’u nda edhe nga drejtoria e shkollës fillore “ Sami Frashëri “ në Lluçan, respektivisht drejtori Qemal Beqiri.

Si dhe Mirënjohje i’u nda nga ish-nxënësit e tij të cilët kanë lindur më 1979 e që kjo ishte edhe simbolikë sepse arsimtari Ali, pikërisht karrierën e tij si mësimdhënës e ka filluar në këtë vit.

Me një organizim modest nga kolektivi dhe nxënësit, natyrisht mes emocioneve u përcoll arsimtari Ali, tani më me një status tjetër atë të pensionistit dhe veteranit të arsimit./rajonipress/