Mbi 40 vite punë e sakrificë i mbeti besnikë drejtësisë

Gjilan – Shemsedin Pira vazhdon të mbetet njëri nga avokatët me një reputacion jashtëzakonisht pozitiv në fushën e drejtësisë. Duke filluar nga viti 1977 kur edhe nis të ushtrojë profesionin e juristit- avokaturës, Pira do të mbetet besnik i denjë i profesionit. Pavarësisht katrahurave ai i sfidoj të gjitha për të krijuar një karrierë të pasur 40 vjeçare në fushën e drejtësisë. Pira për rajonipress flet për Gjykatën Speciale, për gjykimet e shumta dhe proceset e rënda gjyqësore duke filluar nga gjykimi i Millosheviqit, pastaj vitet e rënda të para luftës, avancimin e tij në shkencë dhe profesion, çmimet e fituara e deri tek koncepti i tij për një sistem drejtësie të avancuar e të udhëhequr nga njerëzit e guximshëm e të profesionit.

Ka një bagazh të shumtë të titujve të fituar, një karrierë e nisur dhe e ndërtuar me shumë mund e sakrifica, një kohë e një gjenerate kur është folur për ndryshimet kushtetues e të imponuara nga Serbia, një kuadër që ka mbrojtur qindra gjykime e procese, një doktor shkence e ligjërues me shumë nam. Ky është Shemsedin Pira njëri nga avokatët më të njohur në Kosovë i cili rrëfen për peripetit e tija gjatë ushtrimit të profesionit për një periudhë 40 vjeçare.

Puna e tij si jurist dhe shef i shërbimit të judikaturës nis qysh në vitin 1977 në kombinatin e tekstilit “Integj” në Gjilan, për të vazhduar më pas në vitet 1983 – 1989 si prokuror dhe zëvendës prokuror. Këto janë vitet ndoshta më të rënda për shkak të ndikimeve politike, por që Pira mbetet i përkushtuar dhe i palëkundur për ta avancuar dijen e profesionin.

Duke qenë këmbëngulës dhe në mbrojtje të Kushtetutës së atëhershme të Kosovës, Pira nuk zgjedhet tutje prokuror dhe detyrohet që në vitin 1989 të ushtrojë profesionin e avokatit. “Ajo që më ka mbajtur gjallë atëherë ose në këto vite të rënda është vetëm puna, angazhimi, dija profesionale, vendosmëria që mos të dorëzohem. Vërtet kur e krahasojë atë kohë me tani, shoh që ka ndryshime thelbësore. Atëherë prokurori ka pasur autoritet dhe fuqi të madhe për vendosje. I kalova 40 vite në funksion të drejtësisë kosovare e shqiptare dhe besoj që edhe si komb edhe si sistem juridik ende kemi punë për të bërë” shprehet Pira për rajonipress.

Pira e pranon faktin se atëherë, por edhe tani nuk është lehtë të ushtrosh profesione delikate. “Unë për këto 40 vite i qëndrova besnik profesionit dhe drejtësisë dhe kështu duhet të veprojnë edhe gjeneratat e reja”.

Duke komentuar rreth formimit të Gjykatës Speciale Pira thotë se kjo nuk i është dashur popullit të Kosovës. “Edhe eksperimentet duhet të kenë një fund” shprehet Pira.

Po çfarë mbanë mend Pira në karrierën e tij dhe në punën e tij si prokuror e avokat. I kujtohet fare mirë gjykimi kundër Sllobodan Millosheviqit në vitin 2002.”Mendoj se është ëndërr e çdo avokati të përcjellë gjykime e procese të mëdha. Unë e kisha fatin që për të 8 ditë rresht si asistent ligjor i Isak Musliut të prezantojë brenda sallës së Hagës dhe kam përcjellur pjesën më interesante që lidhet me krimet në Kosovë. E falënderoj ABACEL-in që na bëri të mundur këtë përcjellje gjyqësore”.

Edhe rastin Tisa e përmend si një nga rastet ku është përplasur me shumë prova.

Ndërsa Pira thotë se ka pasur rastin të mbrojë shumë pjesëtarë të UÇPMB-së e UÇK-së, e deri tek Lutfi Haziri.

Pira si kuadër i dëshmuar ka edhe sugjerimet për sistemin e drejtësisë në Kosovë. “Sistemi i drejtësisë në Kosovë mund të këndellet vetëm nëse kemi reforma të thella dhe vetëm nëse nëpër institucionet e drejtësisë vijnë njerëz të guximshëm e profesionist. Edhe tani ka kuadro të mira në drejtësi, por janë të pamjaftueshme. Duhet të angazhohen prokuror e gjykatës të rinj për t`i dhënë gjak drejtësisë” shprehet Pira.

Duke folur për skenën aktuale politike në Kosovë, Pira tha se ajo po karakterizohet me shumë përplasje të cilat pastaj po e dëmtojnë Kosovën. “Skena politike duhet të jetë më e përgjegjshme”.

Nuk e harron as mixhën e tij Sinan Hasanin për të cilin thotë se do të mbetet pjesë e historisë shqiptare.

Pira krahas ushtrimit të profesionit për asnjë çast nuk e ka lënë anash as fushën akademike. Aktualisht punon si ligjërues në Kolegjin “Gjilani” ku jep dy lëndë të rëndësishme kurse ka magjistruar në Prishtinë me temën :“Trafikimi i femrave dhe shtytja e tyre në prostitucion pas luftës në Kosovë” derisa ka doktoruar në Universitetin “Internacional” në Maqedoni me temën:”Vrasjet e rënda në Gjilan”.

Pira ndryshe tani së fundit ka marr edhe një mirënjohje speciale për kontributin e dhënë në drejtësinë shqiptare “Justiniani” dhe është nderuar me shumë mirënjohje e çmime në Kosovë dhe jashtë saj.

Gjithashtu është i vetmi i specializuar në Kosovë në degën penale të cilën e ka kryer në vitin 2014. Është autor i një raporti shumë të rëndësishëm për krimet në Anamoravë.

Krejt në fund Pira ka një porosi për pushtetet komunale në Anamoravë. “Mos i neglizhoni kuadrot e dëshmuara sepse është koha e fundit që Anamorava të dijë të vlerësojë kuadrot e veta”./rajonipress