Mbështetja për bizneset lokale dhe të reja – Prioritet për zhvillimin ekonomik të Gjilanit

Gjilan – Bizneset lokale janë zemra e ekonomisë sonë. Çdo dyqan, punishte, kompani apo sipërmarrje e vogël në Gjilan përfaqëson një mundësi pune, një ide të re dhe një shpresë për të ardhmen ka shkruar Mrika Krasniqi Shala.

Postimi i plotë:

Për këtë arsye, vizioni ynë politik është i qartë: të mbështesim fuqishëm bizneset ekzistuese dhe t’i inkurajojmë të rejat.

Si kandidate për Kuvendin Komunal nga radhët e Partisë Demokratike në Gjilan së bashku me Kryetarin në ardhje z. Riad Rashitin, ku besojmë se Komuna duhet të jetë partnere e drejtpërdrejtë e sipërmarrësve, jo pengesë.

Do të angazhohem që: Bizneset e reja të kenë lehtësira tatimore për dy vitet e para. Procedurat burokratike të shkurtohen, duke ofruar një “sportel unik” për të gjitha shërbimet e nevojshme.

Të krijohet një Qendër për Start-Up dhe Inovacion, ku të rinjtë me ide të reja të kenë hapësirë pune, mentorim dhe mbështetje financiare.

Komuna të mbështesë bizneset me grante dhe me përkrahje për modernizim e certifikim, në mënyrë që ato të jenë konkurruese edhe jashtë Gjilanit.

Të organizohen panaire të rregullta të produkteve vendore dhe të fuqizohet marka “Made in Gjilan”.

Me këtë qasje, çdo investim në bizneset tona është investim në zhvillimin e qytetit, në krijimin e vendeve të reja të punës dhe në rritjen e mirëqenies për secilin qytetar./rajonipress/