Mbahet dëgjimi publik për dy rregullore komunale

Gjilan – Rregullorja për taksa komunale si dhe Rregullorja për organizimin dhe përgjegjësitë e Drejtorive komunale, i janë nënshtruar të martën një dëgjimi publik, ku qytetarë dhe zyrtarë komunalë kanë paraqitur vërejtjet dhe sugjerimet e tyre, para se këto dy akte normative të procedohen për miratim në Kuvend Komunal, në njërën nga seancat e ardhshme.

Hevzi Matoshi nga Zyra ligjore e Komunës, ka thënë se në bazë të ligjit mbi financat, është e obligueshme që Rregullorja për taksat komunale të miratohet çdo vit, për t`i përfshirë ndryshimet dhe plotësimet eventuale.

Ai tha se kësaj here ndryshimet ka te disa drejtori dhe ato janë shumë të vogla, derisa në disa të tjera, nuk ka ndryshime nga rregullorja ekzistuese.

Kurse sa i përket Rregullores për drejtoritë komunale, Matoshi tha se ndryshimet janë të nevojshme, për të harmonizuar numrin dhe përgjegjësitë e drejtorive, në përputhje me statutin e ri të Komunës.

Dihet se më herët kanë qenë 12 drejtori, ndërkaq tani janë reduktuar në 10. Kultura, Rinia dhe Sporti janë kthyer në Njësi komunale për Kulturë, Rini e Sport, ndërsa Inspekcioni është shpërndarë nëpër drejtori përkatëse, prandaj është e nevojshme që edhe kompetencat të përshkruhen te drejtoritë, sipas sektorëve të inspekcionit.

Qëllimi ynë është që rregulloret komunale të jenë të pranueshme edhe për qytetarët, ka thënë Matoshi.

Dëgjimit, me vërejtje dhe sugjerime konkrete, i kanë kontribuuar Habib Mahmuti, Saqip Osmani, Mumin Kqiku dhe të tjerë./rajonipress/