Mbahen dëgjimet publike për buxhetin në Radivojc e Skifteraj

Viti – Dëgjimet buxhetore lidhur me Draft Buxhetin e vitit 2019-2021, kanë vazhduar edhe të enjten pasdite në komunën e Vitisë. Strukturat komunale kanë zhvilluar takime me qytetarët e Radivojcit dhe ata të Skifterajt, tek të cilët i kanë prezantuar synimet Institucionale për hartimin e buxhetit, si dhe për mundësit e investimeve , bazuar në buxhetin që ka në dispozicion komuna e Vitisë.

Zv. kryetari i komunës Hasan Aliu, në të dyja takimet me banorët tha se janë të përkushtuar që ndarja e buxhetit të jetë në mënyrë sa më proporcionale dhe transparente, duke i marr parasysh edhe kërkesat dhe nevojat e banorëve për lokalitetet e tyre.

Ndërsa drejtori i Financave dhe Zhvillimit Ekonomik Ibrahim Rama, i njoftoi rreth çështjeve procedurale nëpër të cilat kalon buxheti që nga hartimi e deri në aprovim nga ana e Kuvendit.

Ndërsa banorët, në pjesën e dytë të debateve kanë paraqitur kërkesat e projekteve me prioritet. Në Radivojc, banorët i dhanë prioritet ujësjellësit, me që sipas tyre, ky problem në vazhdimësi e përcjell fshatin, e po ashtu edhe shkollën e cila nuk ka ujë të pijshëm. Gjithashtu, ata kanë identifikuar si projekt me prioritet edhe përfundimin e kanalizimit në tërë fshatin, trotuarin përgjatë rrugës kryesore deri në dalje të fshatit Radivojc, asfaltimin e disa rrugëve lagjore, por edhe rrugëve bujqësore.

Kërkesë tjetër nga ta ishte edhe ndriçimi, si dhe rregullimi i rrethojës së shkollës. Kurse në debatin me banorët e fshatit Skifteraj, ndër prioritetet që u identifikuan, ishte më urgjente problemi i funksionalizimit të ujësjellësit , me që rast u kërkua që fshati të kyçet në rrjetin e ujësjellësit nga Letnica, siç ishte dikur kur shkolla e fshatit, dikur ishte furnizuar nga Gërqari, por se ishte ndërprerë nga serbët në atë kohë.

Në Skifteraj, banorët kërkuan edhe funksionalizimin e ambulantes së fshatit, respektivisht aktivizimin e një mjeku për kontrolle mjekësore të përditshme, rregullimin e disa rrugëve të lagjeve, rregullimin e urave lëshuese ne kanalet e ujitjes, rregullimi i trotuarit edhe në pjesë tjera të fshatit ku qytetarëve u kanoset rreziku nga qarkullimi i automjeteve, mirëmbajtja e ndriçimit publik në tërësi, e gjithashtu edhe në ato pjesë ky rregullimi ishte bërë me vetiniciativën e banorëve dhe kërkesa të tjera.

Debatet publike për buxhetin, sot do të vazhdojnë edhe në Letnicë dhe Stubëll të Epërme./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).