Mavraj gjithmonë bie prej ligës!

Fundi i këtij edicioni pritet të jetë “tragjik” për Hamburgun, i cili tashmë po bie nga Bundesliga gjermane. Por i tillë nuk do të jetë edhe për disa lojtarë të këtij ekipi, për të cilët kjo nuk do të jetë hera e parë që e përjetojnë rënien nga liga, gjë që e kanë shijuar në të kaluarën edhe me klube tjera, shkruan “Gazeta Zëri”.

Dhe, rekordmen i një fenomeni të tillë është mbrojtësi kosovar i Hamburgut, Mërgim Mavraj. Futbollisti i Kombëtares Shqiptare gjatë karrierës së tij e ka provuar disa herë rënien nga liga. Kjo do të jetë hera e katërt dhe skuadra e katërt në karrierën e Mavrajt që bie nga kategoria.

Në vitin 2010 Mavraj kishte rënë nga kategoria me Bochumin. Në vitin 2013 kishte rënë prej ligës me Greuther Furthin, kurse në vitin 2007 rënien nga liga e kishte shijuar me Darmstadtin. Mirëpo, Mavraj është ndër lojtarët kryesorë të Kombëtares Shqiptare, me të cilën ka marrë pjesë në një kampionat evropian – “Franca 2016”.