Matoshi: Komuna ka përfituar një grant nga qeveria zvicerane

Gjilan – Nënkryetari i Kamenicës Fatmir Matoshi ka konfirmuar se komuna është përfituese e një granti nga Projekti DEMOS, por se rezultatet mbi të cilat është fituar ky grant do të bëhen publike tek në gjysmën e dytë të muajit shtator.

Komuna e Kamenicës ka përfituar 40.000 euro nga fondi i Qeverisë Zvicerane i menagjuar nga Projekti DEMOS për performancën komunale.

Nënkryetari i Kamenicës Fatmir Matoshi, ka thënë se ky grant bazohet në performancën komunale të treguar gjatë vitit 2014. “Projekti DEMOS vlerëson performancën komunale bazuar në të dhënat që i merr nga Ministria e Financave, Zyra e Auditorit të Përgjithshëm dhe Ministria e Administrimit të Pushtetit Lokal. Projekti DEMOS nëpërmjet këtyre të dhënave kalkulon pikët e performancës” ka thënë Matoshi

Nënkryetari Matoshi ka thënë se komuna do të mund të tregonte performancë më të mirë me një angazhim edhe më të madh të disa sektorëve.

Granti i këtij viti së bashku me grantin e vitit të kaluar do të përdoren nga komuna për të mbuluar shpenzimet e papaguara të projektit të ujësjellësit Kopërnicë – Kolloleq – Shipashnicë e Epërme.

“Komuna e Kamenicës i është mirënjohëse qeverisë zvicerane dhe projektit DEMOS që ka përzgjedhur Kamenicën si komunë partnere, dhe për mundësinë që kishim që gjatë këtyre dy viteve të shlyejmë obligimet e papaguara të komunës në vlerën prej 72 000 eurosh për sistemin e ujësjellësit, ndërsa grantin që presim ta fitojmë për performancën e këtij viti do të destinojmë në një projekt të ri të infrastrukturës në vitin që vjen” ka thënë Matoshi./rajonipress/