Matoshi i kënaqur me vizitën në Maqedoni

Gjilan – Nënkryetari i Komunës së Kamenicës Fatmir Matoshi tha për rajonipress se është ndarë i kënaqur me vizitën e tij dhe të pjesëmarrësve të tjerë në Maqedoni. Atje kemi parë përvojat e drejtpërdrejta të funksionimit të pushtetit lokal, problemet me decentralizimin të cilat janë identike me ato që po na shfaqen edhe në komunat e Kosovës.

Fatmir Matoshi tha se nga këto takime është njohur me raportet në mes ekzekutivit komunal dhe asambleve komunale, zbatimin e procesit të decentralizimit, funksionalitetin e komunave dhe ofrimin e shërbimeve nga ndërmarrjet komunale si dhe janë trajtuar shumë tema që ndërlidhen me aspektet e qeverisje së mirë dhe bashkëpunimit ndër-komunal.

Matoshi tha se për të personalisht dhe për ekipin e tij nga Kamenica ka qenë një përvojë e mirë vizita në Maqedoni pasiqë delegacioni ku merrnin pjesë mbi 40 anëtarë, kryetarë dhe nënkryetarë, kryetarë të kuvendeve komunale, ishte i kyçur në temat preokupuese dhe të ngjashme me të cilat ballafaqohemi edhe ne si komuna.

Matoshi tha se Besnik Tahiri si udhëheqës i programit e ka realizuar në mënyrën më të mirë të mundshme vizitën e përfaqësuesve kosovar në komunat shqiptare në Maqedoni./rajonipress/