Mashtrimet e brendshme të PDK-së

Nga Arbana Xharra – “PDK-ja është parti e reformave dhe e prurjeve të reja”, kështu propagandon kjo parti me nisjen zyrtare të përgatitjeve për zgjedhjet e brendshme. Prurjeve të reja pa dyshim se Hashim Thaçi iu buzëqesh, por kur vjen puna te vendimet e mëdha, të tjerë janë ata që e kanë pushtetin t’i marrin ato.

Prurjet e reja në këtë parti kanë dëshmuar se nuk mund të mbledhin as dy mijë vota me gjithë “mundin” duke vjedhur aty-këtu nëpër komuna, mezi u bëhen votat për t’i futur prurjet në parlament. Kështu që premtimet se do të ketë ndryshime brenda partisë, me emrat e rinj nuk është gjë tjetër pos mashtrim i brendshëm, i atyre që mbajnë “ymyd” se Thaçi do t’iu japë fuqi brenda partisë.

Ai edhe mund t’iu japë ndonjë pozitë, por që më shumë do t’iu ngjajnë kukullave sepse vendimet e mëdha i marrin ata që dyert e qeverisë i hapin me këmbë. Këto prurje duhet ta kenë të qartë se Hashim Thaçi është “ujk i vjetër” dhe të gjithë lojën e bën për të mbijetuar për vete, për të mos harruar se i është bërë goxha eksperiencë në këtë fushë.

E kush është ai “bir nane” që i futet garës me Hashim Thaçin për pozitën e njëjtë, atë të kryetarit të partisë, me pritjet se do ta mposhtë kreun e deritanishëm?. Çdo garë me kundërkandidatë për pozitën kryesore me këtë formë të votimit është vetëm sa për të thënë se,”kemi zgjedhje të lira e demokratike”.

Pozitat kryesore pas asaj të kreut të partisë; ajo e nënkryetarit dhe e sekretarit të partisë mund të pësojnë ndryshme, me ardhjen zyrtare të Kadri Veselit. Por, jo edhe e kreut të saj të paktën edhe për aq kohë sa Hashim Thaçi bart pozitën e kryeministrit të Kosovës.

Me ardhjen zyrtare të ish-shefit të SHIK-ut në PDK, Kadri Veseli, nuk është prurje e re, sepse ai ka qenë person me pushtet shumë të madh në parti, veçse nuk e ka pasur zyrtarisht librezën e saj. Pastaj Veseli është kartë e mirë në planet e Thaçit për ndryshimet në pushtet dhe në parti.

Në rast se koalicioni i ri arrihet mes PDK-së dhe AAK-së, i cili lidhet vetëm nëse Ramush Haradinaj merr postin e kryeministrit të qeverisë, atëherë Hashim Thaçit nuk i lejohet të bartë të dy poste, atë të kryetarit të partisë dhe të presidentit të vendit në të njëjtën kohë.

Kështu që në rast se Thaçi i siguron vetes mandatin pesëvjeçar me marrëveshjet e reja politike, automatikisht personi që ka më së shumti pushtet dhe përkrahje nga partia dhe strukturat e saj, për kreun e PDK-së është Kadri Veseli.

Se kjo parti udhëhiqet nga një dorë e fortë dhe se nuk ka asnjë element të demokracisë brenda saj, është dëshmuar haptazi. Zgjedhjet e fundit të rregullta të kësaj partie janë mbajtur shtatë vjet më parë në vitin 2005, dhe ato emergjente në vitin 2010, ku vetëm u rikonfirmua mandati i Thaçit dhe fuqia e tij.

Ndërsa me statutin e kësaj partie në nenin e 13 thuhet decedivisht se Kongresi i PDK-së, i cili është organi më i lartë i partisë mbahet çdo dy vjet.

Duke parë që brenda saj po rriten pakënaqësitë dhe se ata që janë zë kundër Thaçit mund të prishin punë, me shumë mjeshtri kreu i saj nuk mbajti zgjedhjet derisa arriti që konkurrencën ta nxjerrë jashtë loje.

Pakënaqësitë e dy zyrtarëve të lartë të PDK-së, Fatmir Limaj dhe Jakup Krasniqi, pos që do të shtojnë vëmendjen e opinionit gjatë procesit zgjedhor, në esencë nuk mund të sjellin ndryshim të madh. Rreziku është që njëri nga ata të humbë pozitën me ardhjen e ish-shefit të SHIK-ut.

PDK-në s’mund ta presë as epilogu i kuvendit të LDK-së, kur janë rrahur me karrige, sepse në PDK ka “burra të fortë” që nuk është aq e lehtë t’u bëhet zë.

Kokat e PDK-së tashmë kanë nisur aplikimin e strategjisë kundër ‘rebelëve’ të saj. Pastaj Thaçi është ekspert i kanalizimit të pakënaqësive, ai i ka metodat e tij sesi “t’ua mbyllë gojën” të pakënaqurve.