Masat ndaj Kosovës, Stano: Raporti i Borrellit ende po finalizohet

Zëdhënësi i Bashkimit Evropian, Peter Stano është deklaruar sot lidhur me raportin e Përfaqësuesit të Lartë të BE-së për Politikë të Jashtme e Siguri, Josep Borrell në lidhje me masat për Kosovën.

Stano tha të martën në një konferencë për media se Borrell është duke e finalizuar raportin rreth hapave që ka ndërmarrë Kosova për heqjen e masave ndëshkuese të vendosura nga BE-ja.

“Raporti ende po finalizohet”, u shpreh shkurt Stano në një konferencë për media.

Zëdhënësi i BE-së po ashtu u pyet lidhur me ndikimin që do të ketë aksioni i Policisë së Kosovës për konfiskim të dinarëve në një bankë ilegale në veri.

“Masat ishin prezantuar si përgjigje e hapave të pakoordinuar dhe unilaterale që çonin më shumë në përshkallëzim dhe nuk ndihmonin në de-përshkallëzim…. çdo gjë që ndodh në terren që ka ndikim negativ në përpjekjet që çojnë në depërshkallëzim do të merret parasysh dhe do të përfshihet në raport…”, tha tutje ai. /Telegrafi/