Masakrimi i Parkut të Qytetit dhe heshtja që trondit Gjilanin: Kur bien drunjtë shekullorë, bie edhe ndërgjegjja qytetare

Gjilan – Në zemër të Gjilanit po zhvillohet një ndër ndërhyrjet më të debatueshme urbane të viteve të fundit. Parku i qytetit, i njohur për dekada si mushkëria e gjelbër e Gjilanit dhe një nga simbolet më identifikuese të jetës urbane, po përballet me transformime të thella, të cilat kanë sjellë prerjen dhe largimin e një numri të konsiderueshëm drunjsh të vjetër, disa prej tyre të mbjellë dekada më parë dhe të shndërruar në pjesë të identitetit të qytetit.

Punimet që lidhen me realizimin e projektit të Bulevardit kanë hyrë tashmë në hapësirën e parkut, ndërsa pamjet e drunjve gjigantë të prerë me mjete motorike kanë shkaktuar reagime të shumta në opinion. Për shumë qytetarë, nuk bëhet fjalë vetëm për prerjen e disa drunjve, por për humbjen e një pjese të memories kolektive të qytetit.

Për dekada me radhë, Parku i Vjetër ka qenë vendi ku janë rritur breza të tërë gjilanasish. Aty janë zhvilluar shëtitjet e para familjare, takimet e miqve, kujtimet e fëmijërisë dhe çastet e qeta të pensionistëve. Ai ka qenë një hapësirë ku qyteti merrte frymë ndryshe, larg betonit, zhurmës dhe ritmit të vrullshëm urban.

Sot, ndërsa drunjtë shekullorë rrëzohen njëri pas tjetrit, ajo që po habit më shumë nuk është vetëm ndryshimi fizik i parkut, por heshtja e madhe që e shoqëron këtë proces. Një heshtje që shumë qytetarë e konsiderojnë shqetësuese.

Pak zëra po dëgjohen nga banorët përreth parkut, ndërsa reagimet publike mbeten sporadike, pavarësisht faktit se po preket një nga asetet më të rëndësishme mjedisore dhe emocionale të qytetit.

Gjilani është njohur tradicionalisht si një qytet me kulturë qytetare, me traditë të gjelbërimit dhe me një komunitet të emancipuar që ka ditur të mbrojë vlerat e veta urbane. Pikërisht për këtë arsye, shumëkush e sheh si paradoksale mungesën e reagimit në një moment kur po ndryshon përgjithmonë një prej hapësirave më të dashura publike.

Nga ana tjetër, kritika po adresohen edhe ndaj opozitës lokale, e cila sipas vlerësimeve të shumë qytetarëve ka reaguar me vonesë ndaj zhvillimeve në park. Për kritikët, debatet dhe kundërshtimet duhej të ishin ngritur shumë më herët, në fazat kur projekti po planifikohej dhe jo pasi makineritë kishin hyrë tashmë në terren.

Ndërkohë, qytetarët vazhdojnë të kërkojnë më shumë transparencë rreth projektit, ndikimit mjedisor dhe planeve konkrete për zëvendësimin e gjelbërimit të humbur. Ata kërkojnë garanci se zhvillimi urban nuk do të bëhet në kurriz të identitetit ekologjik të qytetit.

Për shumë gjilanas, çështja nuk lidhet vetëm me një park. Ajo lidhet me mënyrën se si një qytet ruan kujtesën e tij, respektin për hapësirat publike dhe raportin me natyrën. Sepse kur rrëzohen drunjtë që kanë qëndruar në këmbë për gjenerata të tëra, nuk humbet vetëm hija e tyre; humbet një pjesë e historisë, identitetit dhe shpirtit të qytetit./rajonipress/