Marsh solidarizues për rektorin
RajoniPress
21:35, 7 Dhjetor, 2014
Kundër vendimit të rektorit Zejnullahu, të enjten para rektoratit protestuan organizatat e dala nga lufta, duke kërkuar regjistrimin e mbi 1000 studentëve pa provim pranues në UP. Aktivistë të Shoqërisë Civile në bashkëpunim me studentë të Universitetit të Prishtinës “Hasan Prishtina”, do të organizojnë një marsh solidarizues për rektorin e Universitetit të Prishtinës, Ramadan Zejnullahu, për qëndrimet e tij karshi situatës së krijuar për studentët fëmijë të dëshmorëve.
Shoqatat e dala nga lufta e UÇK-së, po i kërkojnë rektorit Zejnullahu, që të regjistrojë me automatizëm rreth 1 mijë studentë të cilët kanë vërtetim të familjeve të veteranëve, dëshmorëve apo invalidëve të UÇK-së.
Vendimi i rektorit, i cili nuk lejon pranimin e asnjë studenti që në UP, pa kaluar pragun (30 për qind e testit) e kalueshmërisë në provimin pranues, po merr mbështetje edhe nga një grup i studentëve dhe shoqërisë civile.
Roland Sylejmani, njëri nga organizatorët e këtij marshi, ka thënë për Kosovapress, se të martën në orën 12:00, duke u nisur nga Teatri Kombëtarë në drejtim të Rektoratit, do të organizojnë një marsh solidarizues për rektorin Ramadan Zejnullahu, për siç thotë ai, ndërhyrjes në autonominë e Universitetit nga ana e Ministrisë së Arsimit Shkencës dhe Teknologjisë dhe presioneve të tjera nga OVL UÇK.
“Vendimet e Rektorit i konsiderojmë të drejta dhe konform ligjit. Ne jemi grup qytetarësh e studentësh që jemi mbledhur për të përkrahur çdo nismë të shëndosh që do të kontribuonte në të mirën e Universitetit”, ka thënë Sylejmani për KosovaPress.
Kundër vendimit të rektorit Zejnullahu, të enjten para rektoratit protestuan organizatat e dala nga lufta, duke kërkuar regjistrimin e mbi 1000 studentëve pa provim pranues në Universitetin e Prishtinës.
Këtë kërkesë, ata e bënë duke iu referuar një marrëveshje të mëhershme mes Ministrisë së Arsimit dhe Rektoratit të UP-së, përderisa në anën tjetër Rektorati, po konsideron se një kërkesë e tillë është e jashtëligjshme.
Veteranët e luftës, kërkuan po ashtu dorëheqjen e Rektorit, meqenëse ka kohë që nuk po pranohet kërkesa e tyre për regjistrimin me automatizëm të mbi 1000 studentëve.
