Marrëveshje ose zgjedhje

Presidentja e Kosovës, Atifete Jahjaga, e ka ndryshuar diskursin gjatë takimeve me liderët e partive që kanë fituar ulëse në Kuvendin e Kosovës. Derisa në takimet e mëhershme ka kërkuar nga ta që me mirëkuptim të arrijnë një marrëveshje për zhbllokim të shtetit nga kriza institucionale, të premten ua ka përkujtuar për herë të parë shkuarjen në zgjedhje të parakohshme.

Këtë paralajmërim të sajin e ka bërë publik lideri i Vetëvendosjes, Albin Kurti. Ai ka thënë se Jahjaga në fakt ka ofruar dy opsione për të dalë nga kriza. Opsioni i parë del të ketë qenë marrëveshja mes liderëve të partive politike, përderisa si opsion i dytë del të jetë përmendur shkuarja në zgjedhje të reja.

Jahjaga ka përsëritur qëndrimin se zgjidhjet duhet të gjenden brenda kuadrit kushtetues dhe bazuar në vendimet e Gjykatës Kushtetuese dhe theksoi domosdoshmërinë që liderët, duke e vlerësuar seriozitetin e situatës në të cilën gjendet vendi, të ofrojnë zgjidhjet që çojnë drejt ndërtimit të institucioneve, duke kërkuar rrugë që shmangin përsëritjen e zgjedhjeve…(Tribuna)