Marrëveshja Kolektive, zbatim në letër

Po bëhen gati katër muaj qëkur ka hyrë në fuqi Marrëveshja Kolektive, mirëpo deri më tani në sektorin privat kjo marrëveshje ka gjetur zbatim vetëm 10 për qind. Kështu deklaroi Jusuf Azemi, kryetar i Sindikatës së Punëtorëve të Sektorit Privat, pas një takimi që zhvilloi me punëtorët teknikë të shkollës ekonomike të Prishtinës, të cilët deklarojnë se pronari po i shkel të drejtat e tyre, duke ia vonuar pagat.

Azemi ka thënë se pavarësisht zotimeve të ministrit të Punës dhe Mirëqenies Sociale se Kontrata Kolektive pas hyrjes në fuqi do të gjejë zbatim, ky premtim ka mbetur vetëm në letër. “Edhe këtyre punëtorëve po u shkelën të drejtat nga pronari i kompanisë, duke ia vonuar pagat. Gjendja ekonomike e këtyre punëtorëve është shumë e rëndë dhe që të ketë vonesa kjo është e papërballueshme” ka thënë ai.

Sipas Azemit, deri më tani si Sindikatë kanë bërë shumë presione dhe shumë protesta nëpër kompani të ndryshme, por që nuk kanë rezultuar me përmirësim të gjendjes së punëtorëve.

Nëse edhe në muajin në vazhdim nuk do të ketë përmirësim, atëherë, sipas tij, do të organizohet protestë masive./zeri/