MAPL rreth rastit Mitroviq?

Gjilan – Kuvendi Komunal i Gjilanit i ka kërkuar sqarim zyrtar Ministrisë së Pushtetit Lokal, për rastin e Srgjan Mitroviqit, i cili duke qenë anëtar i vendimmarrjes komunale, si përfaqësues i zgjedhur nga komuniteti serb, në të njëjtën kohë ka pranuar të emërohet edhe kryetar i komunës paralele në Gjilan, që në Kosovë është strukturë e pa ligjshme.Strukturat paralele në Kosovë mbrojnë interesat e Beogradit dhe pengojnë integrimin e komunitetit serb në jetën shoqërore e publike të Kosovës.

Mitroviq, në Kuvendin Komunal të Gjilanit, ku është anëtar prej dy vitesh, nuk e ka ngritur asnjëherë zërin për interesat e serbëve lokalë.

MAPL nuk është përgjigjur drejtpërdrejt për rastin konkret, por i ka sqaruar rrethanat ligjore kur mund të humbet mandati. “Kryetari i Komunës dhe anëtarët e zgjedhur të Kuvendit të Komunës, bazuar në nenin 3 paragrafi 3.2 të Ligjit nr 03/L-072 për zgjedhjet lokale në Republikën e Kosovës nuk mund të jenë anëtarë të asnjë organi tjetër të zgjedhur”, thuhet ndër të tjera në përgjigje.

A është përmbushur ky kusht në rastin konkret? Në faqen zyrtare të qeverisë së Republikës së Serbisë ekziston i publikuar vendimi për shkarkimin e Zoran Stojkoviqit nga detyra e kryetarit të organit të përkohshëm të Komunës së Gjilanit si dhe emërimit të Srgjan Mitroviqit në këtë post. Vendimi mban datën 11 dhjetor 2015.

Kjo është dëshmi e mjaftueshme që Mitroviqit t`i merret mandati dhe ai t`i kalojë një kandidati tjetër nga lista e pjesëmarrësve në zgjedhje, që ka më shumti vota./rajonipress/