Maloku: Shqiptarët kanë kapacitete që të jenë faktorë në Ballkan, por s’po punojnë në këtë drejtim

Eksperti i sigurisë, Naim Maloku, në emisionin “Rrokum Roll” të televizionit Rrokum, ka theksuar se aneksimi i Krimesë nga ana e Rusisë ka ndikuar edhe në rajonin tonë. Ai ka thënë se përmes Serbisë, Rusia po e shtrin ndikimin e saj në Ballkan.

“Përmes Republikës Serbe, Serbia dëshiron ta destabilizoi gjendjen në Ballkan”, ka thënë Maloku.

Ai ka theksuar se shqiptarët nuk kanë fuqi dhe kapacitete që të ndryshojnë kufijtë, porse “ne jemi në anën e NATO-s, sepse njësia territoriale e Kosovës është kompetencë e forcave veriatlantike, e Shqipëria veç është anëtare e këtij mekanizmi”.

“Kosova dhe Shqipëria i kane të gjitha kapacitetet e mundshme që të jenë faktorë në Ballkan, por që nuk po punohet në këtë aspekt”, ka theksuar Maloku, duke shtuar se shqiptarët duhet të kenë aleancë me Kroacinë. /Telegrafi/