Maloku: Aksioni në Karaçevë do të vazhdojë, pritet të ketë arrestime të reja

Gjilan – Kryeprokurori Jetish Maloku thotë se aksioni i Karaçevës pritet të vazhdojë ende dhe shumë shpejt pritet të ketë edhe arrestime të tjera. Në aksionin e Karaçevës pos që është shënuar si aksioni më i madh në Kosovë, kundër grupeve kriminale aty kemi arritur ta kthejmë në normalitet edhe një pjesë të tokës së Kosovës e cila shfrytëzohej nga Serbia e herë nga Kosova, tokë kjo e cila gjithmonë ishte pronë e Kosovës tha Maloku.

Aksioni më i madh i ndodhur ndonjëherë në Kosovë kundër grupeve kriminale dhe aktiviteteve të kundërligjshme të tyre, kishte ndodhur pikërisht në pjesën e përfolur ma së shumti, nga paslufta e këndej, e kjo është Karaçeva, territor që ndanë Kosovën dhe Serbinë, por që biznesi dhe përfitimet e kundërligjshme i bënin bashkë serb e shqiptarë.

Nga burimet tani të sigurta e të konfirmuara edhe nga Kryeprokurori i Prokurorisë Themelore në Gjilan, Jetish Maloku, plani për kthimin në normalitet dhe goditja e të gjitha grupeve kriminale të cilët zhvillonin lirshëm aktivitete kriminale, në këtë pjesë të Kosovës kishte filluar në fund të muajit gusht të vitit 2019.

“Ishte planifikuar e zbatuar ky plan me shumë përpikëri e seriozitet sepse nga çlirimi i Kosovës në vitin 1999 e tutje, deri më 18 shtator 2020, llogaritej pronë, sa e Kosovës sipas dokumenteve valide, po aq e Serbisë, sipas Marrëveshjes Teknike të Kumanovës të qershorit të vitit 1999” sqaron Maloku për rajonipress.

“Ka qenë vendimi definitiv i goditjes dhe shumë mirë i planifikuar me kohë,(i Kryeprokurorit, prokurores së rastit dhe ekipit të besuar nga Policia e Kosovës, IPK dhe agjenci tjera të ligjit), i 18 shtatorit 2020, që ka kthyer definitivisht ketë tokë, aty ku e kishte vendin, duke goditur edhe grupet kriminale që manovronin lirshëm në këtë pjesë, kur u arrestuan (35) të dyshuar vetëm në natën e parë të ndërhyrjes, e më pas edhe shumë të tjerë, duke quar në (63 ) të arrestuar, të gjithë për vepra të ndryshme kriminale”.

Maloku thotë se aksioni në fjalë është ende në vazhdim e sipër. “Pritet shpejt të ketë edhe arrestime të tjera. Janë arrestuar, pronar të kazinove, menaxher të tyre, zyrtar policor, kontrabandues të mallrave, pronar të fabrikave për përpunimin e mishit, etj. Janë konfiskuar pasuri materiale e sende me vlerë, e cila është në llogaritje e sipër, e do bëhen edhe hetime financiare për gjithë ata që kanë krijuar pasuri me aktivitete kriminale e të pa ligjshme. Por, në fund të fundit ajo që është më e rëndësishme, e cila nuk thuhet, por është shumë e vërtetë, kjo pjesë e tokës që ishte e Kosovës e që ishte shpallur diskutabile me Marrëveshjen Teknike të Kumanovës të vitit 1999, me mundësi të futjes në agjendë të bisedimeve Kosovë – Serbi, i është kthyer normalitetit dhe shtetit të Kosovës, falë intervenimit dhe goditjes në kohën e duhur dhe vendosmërisë së institucioneve të drejtësisë dhe sigurisë, për ma shumë nga ata që udhëheqin këto institucione dhe larg pushtetit politik i cili për ma shumë se 20 vite, nuk kishe bërë asgjë për këtë pjesë të Kosovës” tha Maloku./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).