Maliqi: Shqiptarët e Luginës duhet të protestojnë më 1 shtator

Njohësi i arsimit në Luginën e Preshevës, Bilall Maliqi ka thënë se nxënësit dhe mësimdhënësit e Luginës, duhet ta shfrytëzojnë të drejtën e tyre për të protestuar më 1 shtator, në mënyrë që siç ka thënë ai, edhe Bashkësia Ndërkombëtare ta shoh që shqiptarëve të Luginës së Preshevës po iu privohet e drejta elementare.

Përmes një postimi në profilin e tij zyrtar në rrjetin social “Facebook”, Maliqi ka shkruar se përderisa në Kosovë nxënësit dhe mësimdhënësit serbë mësojnë në gjuhën serbe e me planprogram të Serbisë pa u penguar nga askush, nxënësit e mësimdhënësit shqiptar të Luginës së Preshevës nuk kanë as libra të mirëfillta për të mësuar në gjuhën e tyre amtare, transmeton “Zeri.info”.

Postimi i plotë i Maliqit:

A duhet të fillojë mësimi në Luginën e Preshevës me 1 shtator, apo duhet protestuar ?!

Dihet mirëfilli se nxënësit shqiptar edhe këtë vit do ta fillojnë mësimin me tekste të munguara, të përkthyera e të papërshtatura si duhet, dhe me planprogram të Ministrisë së Arsimit të Republikës së Serbisë.

Kjo në masë të madhe e ulë nivelin e mësimxënies për nxënësit, të tanë, të cilët prapë do të ngelen pa tekste nga Kosova, ku ato kohë më parë e gjetën “banimin” e përkohshëm në Terminalin e Preshevës, duke paguar edhe “qëra” për sa kohë kanë qëndruar.

Në Kosovë nxënësit serbë, mësojnë me libra nga Beogradi dhe me planprogram të Serbisë dhe ate pa i penguar kush, ndërsa tek ne nuk lejohen librat burimor shqip nga Kosova apo edhe nga Shqipëria.

Nxënësit tanë dhe mësimdhënësit, duhet ta shfrytëzojnë të drejtën e tyre për të protestuar për ta sensibilizuar këtë çështje, e cila është peng shumë kohë, e që Bashkësia Ndërkombëtare t’i ketë parasysh këto shkelje të të drejtave lidhur me arsimin dhe me sigurimin e teksteve që prekin në tabanin tonë kombëtar, të jenë nga Kosova apo Shqipëria.

Këtë status timin po e përmbylli me një fjalë të urtë popullore:

“Ka nënë që pa qarë fëmia nuk i jep gji”…