Makolli, biznesmenët tonë në Gjermani të investojnë në Kosovë

Në qytetet Frankfurt dhe Köln të Gjermanisë janë duke u mbajtur takime me bizneset e diasporës. Në këto takime po marrin pjesë përfaqësues nga Ministria e Diasporës, Ministria e Zhvillimit Ekonomik, Oda Ekonomike Amerikane, UNDP-ja, IOM-i si dhe përfaqësues të bizneseve të diasporës në Gjermani.

Biznesmeni nga Stuttgarti, Valon Aliu, përveç biznesit në Gjermani ka investuar edhe në Kosovë. Ai tregoi shembullin konkret të investimeve të tij, sfidat dhe sukseset që ka pasur deri tani. “U bëj thirrje të gjithë atyre që kanë pak mundësi, të investojnë në Kosovë”, tha Aliu në tubimin e organizuar në Frankfurt.

Sipas njoftimit të Ministrisë së Diasporës, të premten delegacioni kosovar vizitoi disa biznese në Frankfurt. Ndërsa nesër në Köln do të mbahet konferenca për investime i quajtur “Rrjetëzimi i bizneseve të diasporës në Gjermani”.

Qëllim i konferencës është krijimi i rrjetit të bizneseve të diasporës në Gjermani.

Konferenca për investime “Rrjetëzimi i bizneseve të diasporës në Gjermani” mbështetet nga UNDP-ja dhe nga IOM-i.