Makinat mjelëse rrisin numrin e lopëve qumështore në ferma

Gjilan – Në një hulumtim të ekspertëve të sektorit për blegtori dhe veterinari shihet se Drejtoria për Bujqësi dhe Pylltari në Gjilan, në periudhën 2008-2012 ka furnizuar me makina mjelëse 300 ferma prodhuese të qumështit. Sipas Nazmi Rapucës drejtor për bujqësi në Gjilan projekti ka pasur këto objektiva, lehtësimi i punës në ferma, përmirësimi i kualitetit të qumështit, rritja e kapaciteteve të lopëve në nivel ferme, preventiva ndaj sëmundjeve të gjirit (mastiteve) etj.

Për të parë efektin e këtij projekti, ekspertët e sektorit për blegtori dhe veterinari, nga drejtoria për bujqësi, kanë realizuar 43 vizita direkt në teren. Qëllimi i këtij hulumtimi ka qenë për të parë se sa ka ndikuar projekti i makinave mjelëse në rritjen e numrit të lopëve qumështore në ferma, si është gjendja e makinave sot dhe a janë shfrytëzuar si duhet, sa është rritur sasia e qumështit në ferma, si është cilësia e qumështit, si është kondicioni trupor i lopëve, gjendja shëndetësore e lopëve, kualiteti i ushqimit dhe higjiena në stalla etj.

Nazmi Rapuca tha se nga ky hulumtim janë nxjerr këto përfundime – konstatime. Të gjithë përfituesit i posedojnë makinat në fermat e tyre. Ato janë përdorur sipas qëllimit të projektit dhe asnjëra nuk është keqpërdorur. Numri i lopëve qumështore, tek 43 fermerët e vizituar, në momentin kur kanë marrë makinën mjelëse ka qenë 329 krerë, ndërsa në momentin e kontrollës (janar dhe shkurt të vitit 2013) numri i lopëve në këto ferma është 416. d.m.th numri i lopëve është rritur për afër 26.50 %.

Prodhimi i qumështit në 416 krerë lopë është 3074 litra në ditë ose 13.50 litra për kokë lope. Kjo sasi qumështi për krerë, është 50 % më pak krahasuar me potencialin që kanë lopët qumështore .Shumica e fermerëve të vizituar e dorëzojnë qumështin në qumështore, ku një pjesë e tyre është në ekstra klasë. Kondicioni trupor i lopëve në përgjithësi ishte i mirë. Shumica e fermerëve nuk kanë bazë të mjaftueshme ushqimore për shkak të mungesës së tokës bujqësore dhe për shkak të kushteve të rënda klimatike që ishin në vitin paraprak (thatësirat). Higjiena e stallave në shumicën e fermerëve nuk është e përshtatshme për shkak te infrastrukturës së vjetër stallore dhe për shkak të numrit të madh të lopëve për njësi të sipërfaqes së dyshemesë. Gjendja shëndetësore e lopëve është relativisht e mirë.

Sipas hulumtimit çdo fermë e vizituar nga ekspertët e drejtorisë është këshilluar për mënyrën më të mirë të mbarështimit të lopëve qumështore. Gjatë vizitave në teren kemi hasur në dy ferma të cilët e kanë ndërruar drejtimin e prodhimit, duke u profilizuar në prodhim të mishit.

Pas këtij hulumtimi Rapuca tha se u është rekomanduar fermerëve që prodhuesit e qumështit të përmirësojnë infrastrukturën shtallore. Të përmirësohet higjiena dhe të aplikohen praktikat e mira të mjeljes dhe ruajtjes së qumështit. Të mbarështojnë raca tipike qumështore, të planifikojnë bazën ushqimore në nivel ferme, t`i ndjekin trajnimet , seminaret dhe këshillat që organizon DBP dhe ekspertet nga jashtë, të mbahet evidenca në ferma duke përfshirë ushqimin, prodhimin e qumështit ditor, mbaresimin, shpenzimet që bën fermeri dhe çdo detal tjetër që lidhet me fermën. Të aplikohen masat preventive si ; vaksionimi kundër parazitëve dhe sëmundjeve bakteriale.

Meqë një pjesë e tyre i lëshojnë kafshët në kullosa në pranverë rekomandojmë që para daljes në kullosa të përgatiten mirë për të kaluar më lehtë nga ushqimi i thatë në ushqim të njomë. Gjithashtu kafshët para daljes në kullosë duhet të imunizohen me vaksina kundër Antraxit, Këmbëzezës, Edemes Malinje dhe të trajtohen kundër parazitëve si ; Fashiola Hepatica dhe Dikrocelioza. E njëjta masë preventive të aplikohet edhe në vjeshtë kur kafshët e përfundojnë kullosën dhe kthehen në stalla tha Rapuca./rajonipress/