Majlinda Kelmendi, optimiste për edhe një medalje në Lojërat Olimpike

Në katërvjetorin e triumfit të saj në Lojërat Olimpike 2016, Majlinda Kelmendi e ka kujtuar momentin kur e fitoi garën, duke premtuar medalje edhe në Tokio verën e ardhshme, në intervistën e dhënë për Komitetin Olimpik të Kosovës.

Më 7 gusht të vitit 2016, Majlinda Kelmendi shkoi histori në Kosovë duke e fituar medaljen e parë të artë të vendit në debutimin në Lojërat Olimpike, duke bërë kështu që Kosova të jetë në mesin e 106 shteteve të botës që kanë të paktën një medalje të artë në koleksionin e tyre, transmeton Gazeta Express.

Majlinda, në atë kohë 25-vjeçare, kishte triumfuar në kategorinë e peshave deri në 52 kilogramë, pasi që e kishte mposhtur italianen Odette Giuffrida me “yoku” në finale. Pas triumfit, pejania ishte ulur në gjunjë dhe kishte filluar të qante, pak para se të shkonte te një grup i vogël i përkrahësve, të cilët po thërritnin “Kosova, Kosova!”.

Këtë herë ky përvjetor po ju gjen në Turqi në kamp përgatitor. Si po ndiheni sot në 4-vjet me medalje të artë?

Sa më shumë kohë që po kalon aq më e pabesueshme po më duket medalja e artë Olimpike. Jam shumë e lumtur dhe krenare njëkohësisht.

A keni marrë sot urime për këtë përvjetor dhe a ju ka uruar edhe ndonjë xhudiste ose personalitet i lartë në Kosovë ose jashtë vendit?

Kam marrë mjaft urime sot dhe mendoj qe medaljes Olimpike ju kanë gëzuar të gjithë shqiptarët kudo që janë.

Si ndiheni kur i shihni videot e finales apo të pranimit të medaljes, si dhe a i shikoni ende luftërat deri në finale?

Kohë pas kohe i shikoj luftërat, dhe sa herë që i shoh më emocionojnë shumë. Kujtimi është ende shumë i freskët.

Cilin moment e kujtoni më së shumti nga 7 gushti 2016. Finalen, ceremoninë e medaljeve, ngritjen e flamurit apo…?

Që të gjitha këto që i përmendët e kanë pasur domethënien e vet, secili kujtim është më i bukur se tjetri.

Çka ka ndryshuar tek Majlinda prej fitimit të medaljes së artë Olimpike?

Realisht asgjë, sepse vazhdoj me qenë Majlinda e njëjtë qysh kam qenë gjithmonë.

7 gushtin 2021 do ta festosh vetëm me medaljen e Rios, apo edhe me ndonjë medalje nga Tokio 2020?

Besoj shumë që prej Tokios do të kthehem me medalje.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).