Majlinda, e para nè botë në të gjitha kategoritë

Majlinda Kelmendi është xhudistja më e mirë në botë. Xhudistja nga Peja është renditur e para në ranglistën botërore nga Federata e Xhudos Ndërkombëtare për të gjitha kategoritë meshkuj dhe femra.

Majlinda Kelmendi aktualisht është xhudistja më e mirë në botë. Këtë vlerësim e ka bërë Federata e Xhudos Ndërkombëtare (IJF).

Përveç kategorisë deri në 52 kilogram, xhudistja pejane tani gjendet e para në ranglistën botërore për të gjitha kategoritë, meshkuj dhe femra.

Kelmendi, e cila së fundi fitoi medaljen e artë në turneun Grand Slam ‘Parisi 2014’, i prinë bindshëm ranglistë botërore me 3226 pikë të tubuara.

Ajo ka lënë prapa vetës xhudistin nga Istraeli, Yarden Gerbi e cila renditet e dyta me 2884 pikë.

Trajneri i pejanes, Driton Kuka këtë e ka vlerësuar si një të arritur të madhe për xhudon dhe shtetin e Kosovës.

“Për një shtet si Kosova, vendi i parë në ranglistën botërore do të mjaftonte edhe vetëm për një orë. Kjo nuk donë koment. Përveç, që është më mira në kategorinë e vet, Majlinda është më e mirë ndër të mira. Kjo është vështir të arrihet kur dihet se çfarë garues ka në xhudo. Ky është lajmë i mirë,”, ka deklaruar Kuka për Express.

Ai ka thënë se rezultatet e Majlindës nuk janë të rastësishme. Sipas Kukës, xhudistja nga Peja ka pasur vazhdimësi në garat ndërkombëtare tash e disa vite.