Mahmuti: Mërgimtarët të mirëseardhur, ligji i njëjtë për të gjithë

Gjilan – Elmina Mahmuti thotë se policia është përgatitur dhe bërë gati për ardhjen e mërgimtarëve. Mahmuti thotë se mërgimtarët do të ndihmohen në çdo aspekt, por rregullat nëpër dasma e ahengje janë njësoj për të gjithë.

”Edhe pse ka një vetëdijesim të qytetarëve rreth përdorimit të armëve nëpër ahengje, megjithatë ne ende jemi të shqetësuar dhe kërkojmë nga çdo qytetar apo mërgimtar që t`i përmbahet udhëzimeve tona sepse askush nuk do të tolerohet”.

Mahmuti tha se ardhja e mërgimtarëve ka ngritur edhe nivelin e policisë për ti pritur ata sa më mirë që është e mundshme. “Ne po bëhem gati për të pritur fluksin e mërgimtarëve. Statistikat flasin se me ardhjen e tyre rriten edhe aksidentet, gjuajtjet me armë në ahengje e dasma. Përkundër respektit ne jemi të detyruar që të zbatojmë ligjin dhe nuk do të ketë tolerime për askënd” shprehet Mahmuti.

Mahmuti tha se këtë vit problem mbesin menaxhimi i parkingjeve dhe rrugëve të vjetruara. “Parkingjet janë të pakta derisa rrugët e vjetruara e vështirësojnë qarkullimin normal të vozitësve” thotë ajo.

Mahmuti shpreh edhe një shqetësim tjetër që lidhet me sigurinë e qytetarëve. “Sivjet kemi rritje të aksidenteve me fatalitet dhe kjo është tepër brengose” tha Mahmuti.

Njeriu i parë në policinë rajonale në Gjilan ka edhe një falënderim për qytetarët. “Vërtet pa ndihmën e qytetareve vështirë është që të ruhet stabiliteti dhe siguria në të gjitha aspektet. Janë pikërisht qytetarët që duhet falënderuar për këtë arritje” tha Mahmuti. /rajonipress/