Madhështia e një Iftari!

Nga Nexhmedin Saqipi – Nuk thuhet kot se “Ramazani dhe agjërimi ndihmojnë në forcimin e shoqërizimit të njeriut, të marrëdhënieve të tij brenda në familje dhe me pjesëtarët e tjerë të shoqërisë”. Kjo filozofi s’ka se si të mos lidhet me zhvillimin e kulturës së shoqërizimit dhe bamirësisë.

Duke u mbështetur në këto vlera që ka muaji i Agjërimit për myslimanët e botës, njeriu më i fuqishëm i planetit, presidenti i shtetit më të fortë, që njeh historia e njerëzimit, amerikani Donald Trump, shtroi iftar në Shtëpinë e Bardhë.

Në Iftarin e përbashkët me zyrtarë të lartë të administratës Amerikane, diplomatë e ambasadorë të qindra vendeve, presidenti Trump, nikoqir i këtij Iftari të madhërishëm tha se “Ramazani është koha kur njerëzit i bashkojnë forcat për t’i kultivuar shpresën, tolerancën dhe paqen. Pikërisht në këtë frymë jemi bashkuar sonte për iftar”.

Por e veçanta e këtij Iftari, për ne shqiptarët kudo që jemi, është se përkrah këtij burri të madh shtetëror, presidentit të shtetit më të fuqishëm në botë, Donal Trumpit, u gjet Ambasadorja e Kosovës në Shtetet e Bashkuara të Amerikës (SHBA), Vlora Çitaku.

Të ulesh afër një presidenti siç është Trump, në prani të qindra diplomatëve dhe ambasadorëve tjerë, nuk është e lehtë dhe aq e mundshme. Prania e Ambasadores shqiptare në një Iftar të tillë, ulja e saj afër presidentit, nuk e bënë krenare vetëm Vlora Çitakun, por gjithë shqiptarët gjithandej.

Meqenëse, zakonisht, gjatë Iftarit, shkëmbehen mendime, Ambasadorja Vlora, shfrytëzoj rastin të shprehet se në shtetin e saj, në Kosovën sekulare, ka një kulturë tolerance dhe harmoni ndërmjet religjioneve.

Jo vetëm kaq, ajo e njoftoi presidentin Trump, mbi sfidat me të cilat ballafaqohet aktualisht Kosova dhe domosdoshmëria e përfshirjes së drejtpërdrejtë të SHBA-ve në proceset e rëndësishme nëpër të cilat po kalon ky shtet i ri.

Pjesëmarrja e Ambasadores Vlora Çitaku, në Iftarin e shtruar në Shtëpinë e Bardhë, pati jehonë të madhe në mediat rajonale dhe vendore, duke i llogaritur edhe ato serbe dhe disa shqiptare, te cilat nga kënde të ndryshme e kanë parë këtë iftar të madhërishëm.

Përveç presidentit amerikan Trump, që shtroi Iftar me rastin e muajit të bekuar të Ramazanit, kështu veprojnë e dhe Ambasadat amerikane të akredituara në shtete ë ndryshme, par edhe në Serbi.

Sa i përket Iftareve të organizuara nga Ambasadat e akredituar në Serbi, vlen të ceket se ato zënë fill nga viti 2001, kur për herë të parë, para 18 vjetësh, në vilën ministrore të organizuar nga ministri federative i pakicave Rasim Lajiçi, u shtrua një Iftar me ambasadorët e shteteve islamike, të akredituara në Beograd, e ku ishin të pranishëm Nexhmedin ef. Saqipi, kryetar i Këshillit të Bashkësisë Islame në Bujanoc, Shaip Kamberi, kryetar i Këshillit për të Drejtat e Njeriut dhe Fatmir Hasani, kryetar i Fondit Solidar.

E sot organizimi i Iftareve është kthyer në traditë, mirëpo ka disa nga qarqe të ndryshme, këtë mision e shfrytëzojnë për qëllime politike, komerciale dhe propagandistike.

Si do që të jetë, çështja e Iftareve dhe misioni që ka muaji i shenjtë i Agjërimit, janë vlera universale, të cilat zhvillojnë te individi dhe shoqëria ndjenjat e tolerancës, mirëkuptimit, paqes, solidarësisë e komunikimit ndërfetar dhe ndërnjerëzor.