Maas: Dialogu të përfundojë me njohje, duhen kompromise

Ministri i Jashtëm gjerman, Heiko Maas, gjatë takimit me krerët e shtetit, ka folur edhe për dialogun Kosovë-Serbi.

Ai ka thënë se dialogu Kosovë-Serbi duhet të përfundojë me njohje reciproke.

Tutje ka theksuar se në procesin e dialogut duhet të ketë kompromise deri në zgjidhjen përfundimtare.

“Njohja e Kosovës do të jetë një nga elementet e zgjidhjes, përndryshe s’do të realizohet. Është normale që në dialogjet për normalizim, duhet të ketë dhe ka kompromise. S’dua të tërheq linja të kuqe, por e di që edhe nga ana tjetër, për shkak të rrethanave historike do të jetë e vështirë dhe s’dua ta ngarkoj edhe më tej procesin, por në fund të procesit dëshiroj të gjejmë zgjidhje për të gjitha çështjet”, ka deklaruar ai.

Çështjen e kompromiseve në dialog ditë më parë e përmendi edhe presidenti amerikan, Joe Biden, në një letër drejtuar kryeministrit Albin Kurtit.

Ministri i Jashtëm gjerman, ka folur edhe për sigurimin e vaksinave kundër coronavirusit.

Maas ka thënë se gjatë javëve të ardhshme do të vijnë edhe një numër prej 100 mijë vaksinave antiCOVID në Kosovë.

Më tej theksoi se është i vetëdijshëm që kjo nuk është e mjaftueshme, prandaj theksoi se do të vazhdojnë t;i dalin në ndihmë Kosovës për të vaksinuar edhe pjesën tjetër të popullsisë./telegrafi/