LVV në aksion me parullën:“Barazi në institucione, në punë dhe në pronë”

Gjilan – Kjo është parulla me të cilën aktiviste dhe aktivistë të Lëvizjes Vetëvendosje në Gjilan, shprehën shqetësimin e tyre për mos barazinë e madhe shoqërore ku gruaja është shumëfish e shtypur.

Këto parulla ata i shënuan mbi muret e institucioneve komunale, duke thënë se këtë mesazh duan ta përçojnë deri tek ata që duhet të veprojnë institucionalisht.
“Pavarësisht se në kuadër të ligjeve të Republikës së Kosovës, ekziston edhe ligji për Barazi Gjinore, ai për një dekadë e tepër tashmë ka mbetur vetëm i shënuar në letër, si mungesë e moszbatueshmërisë së tij. Në Kosovë gruaja është larg institucioneve, larg punës dhe larg pronës. Këtë më së miri e tregojnë edhe statistikat, sipas së cilave rreth 82% e grave janë mos-pjesëmarrëse në tregun e punës, ndërkohë që vetëm 4% e tyre janë pjesëmarrëse në trashëgimi të pronës. Kjo është mjaft shqetësuese dhe do të duhej të ishte për të gjithë, sepse pa barazi gjinore dhe të drejta të barabarta edhe për gruan, nuk mund të ketë zhvillim të një shteti”, ka thënë aktivistja dhe asambleistja Arbëreshë Kryeziu Hyseni.

Ky aksion, është vazhdë e aksioneve të ndërmarra nga gratë e Lëvizjes, e që është shënuar në të gjitha qytetet e Kosovës./rajonipress/